काठमाडौं । आईसीसी विश्वकप क्रिकेट लिग २ को आफ्नो दोस्रो खेलमा नेदरल्यान्ड्स विजयी भएको छ । सोमवार त्रिभूवन विश्वविद्यालयको मैदानमा भएको खेलमा नेदरल्यान्ड्सले नामिबियालाई पराजित गरेको हो ।
नेदरल्यान्ड्सले ७ विकेटले नामिबियालाई हरायो । नेदरल्याण्डको जितमा आर्यन दत्त एक्लैले ६ विकेट लिए । ९ ओभर बलिङ गरेका उनले ३४ रन खर्चिएर ६ विकेट लिएका हुन् । त्यस्तै नेदरल्यान्ड्सका लागि कायल क्लेइनले २ तथा म्याक्स ओ डाओड र रोलोफ भान डर भर्वेले १–१ विकेट लिए ।
१२४ रनको सामान्य लक्ष्य पाएको नेदरल्यान्ड्सका लागि ब्याटिङमा मिचेल लेभिटले ५७ रन बनाए भने म्याक्स ओ डाओडले २८ रनको योगदान दिए । उनले २ चौका र २ छक्का हिर्काए । बास डी लिडेले २१ रन बनाए ।
नामिबयाका लागि गेरहार्ड इरासमुसले ७ ओभर बलिङ गर्दै २३ रन खर्चिएर तीन विकेट लिए । ब्याटिङमा जेजे स्मिथले सर्वाधिक २६ रन बनाए भने जेन ग्रिनले १९, रुवेन ट्रम्पलम्यानले २० रन बनाए । अन्य ब्याट्सम्यानले राम्रो खेल्न सकेनन् ।
जितसँगै नेदरल्यान्ड्सले पनि लिग टु को यस सिजनको खेलमा पहिलो अंक जोडेको छ । अंक तालिकामा नेपाल, नामिबिया र नेदरल्याण्ड तीन टोलीले नै समान २-२ अंक जोडेका छन् ।
नेट रनरेटका आधारमा नेपाल शिर्ष स्थानमा उक्लिएको छ ।
नेपाल र नामिबियाबीच बुधवार खेल हुँदैछ ।
