काठमाडौं । घरेलु मैदानमा सुरु तीन खेलको ओडिआई सिरिजको पहिलो खेलमा नेपाल पाहुना टोली क्यानडाविरुद्ध रोमाञ्चक जित निकालेको छ । बिहीबार भएको सिरिजको पहिलो खेलमा कप्तान रोहित पौडेलको घातक बलिङमा नेपालले क्यानडालाई ७ रनले हराएको हो।
जितसँगै नेपालले तीन खेलको सिरिजमा १–० ले अग्रता बनाएको हो। सरिजको दोस्रो खेलमा नेपालले शनिबार खेल्नेछ। नेपालले दिएको २ सय २५ रनको मध्यम लक्ष्य पछ्याएको क्यानडाले ४७.५ ओभरमा अलआउट भयो।
क्यानडाका लागि निकोलस कीर्तोनले सर्वाधिक ६८ रनको योगदान दिए। ९९ बलमा ७ चौका हानेका निकोलस पवन सर्राफको बलमा बोल्ड आउट भए।
तेस्रो विकेटका रुपमा पारगत र निकोलस किर्तोनले ७९ रनको साझेदारी गर्दै क्यानडाको इनिङस् बढाएका थिए। टोलीका कप्तान रोहित पौडेलले ५८ बलमा ९ चौका हान्दै ५० रन बनाएका पारगत सिंहलाई ललित राजवंशीको हातबाट क्याच आउट गराउँदै नेपाललाई महत्वपुर्ण सफलता दिलाएका थिए।
४३ बलमा ३ चौका हानेका हर्ष ठाकरे ३२ रन बनाउँदा कुशल मल्लको हातबाट बोल्ड आउट भए।
ओपनर आरोन जोनसन २० रन बनाउँदा सोमपाल कामीको बलमा एलबीडब्लु धरापमा परे। नवनित डालिवाल ६ रनको रिजन ढकालको बलमा आरिफ शेखको हातबाट क्याच आउट भए। रिजनले डेब्यु विकेट लिएका हुन्।
