खलङ्गा । नेपाल शिक्षक महासङ्घले प्युठान गौमुखी–४ का स्थायी शिक्षक रामकृष्ण पुरीलाई अपमानजनक प्रकारले सरुवा गरिएकोमा त्यसको विरोध गरेको छ ।
शिक्षक पुरीलाई राम्रोसँग विद्यालय प्रशासन सञ्चालन नगरेको आरोपमा घर अपायक पर्ने स्थानमा सरुवा गरिएपछि महासङ्घले विरोध गरेको हो ।
महासङ्घ प्युठानका अध्यक्ष शेरबहादुर थापाक्षेत्री र सचिव जानका केसीको हस्ताक्षरमा २०८० माघ १२ गते प्रेसवक्तव्य जारी गर्दै शिक्षक पुरीलाई साविक विद्यालयमै कायम राख्न माग गरिएको छ ।
वक्तव्यमा उल्लेख भएअनुसार शिक्षक पुरीले गौमुखी–४ पुजास्थित महेन्द्र माविमा गत ३३ वर्षदेखि सेवा प्रवाह गर्दै आउनुभएको थियो ।
२०५७ सालदेखि निम्नमाध्यमिक तहमा सामाजिक विषय शिक्षकको रूपमा सेवा सुरु गर्नुभएका पुरीले २०७१ सालदेखि प्रधानाध्यापकको रूपमा कार्यरत हुनुहुन्थ्यो तर विद्यालय प्रशासन राम्रोसँग सञ्चालन गर्न नसकेको भन्दै पालिकाको शिक्षा समितिले माघ ७ गते निर्णय गरी उहाँलाई अर्घा माविमा सरुवा गरिएको थियो ।
महासङ्घले शिक्षक पुरीको सरुवा दु:ख दिने नियतले गरिएको दाबी गरेको छ । वक्तव्यमा भनिएको छ– “प्रशासन कार्यसञ्चालन सन्तोषजनक नभए प्रअको जिम्मेवारी अरू शिक्षकलाई दिएर उहाँलाई शिक्षककै रूपमा कार्य गर्न दिन पनि त सकिन्थ्यो । समस्या समाधानका अन्य विकल्पहरू रहँदारहँदै निवृत्त हुने समय नजिकिएको समयमा अनुशासित र इमानदार शिक्षकलाई घर अपायक पर्ने टाढाको दुर्गम विद्यालयमा सरुवा गरी उहाँप्रति गरिएको अपमान, दुव्र्यवहार र अमानवीय कार्य हो ।”
वक्तव्यमा अगाडि भनिएको छ– “गौमुखी गाउँपालिकाको यस कार्यप्रति नेपाल शिक्षक महासङ्घ प्युठान घोर आपत्ति प्रकट गर्दछौँ र उक्त कार्य अविलम्ब बदर गरी निजलाई महेन्द्र माध्यमिक विद्यालय पुजामै कार्यरत रहने व्यवस्था मिलाउन जोडदार माग गर्दछौँ ।”
