काठमाडौं । रक्तिम सांस्कृतिक अभियान, रौतहटले अफ्नो प्रस्तुती ‘नरुनु आमा’ ल्याएको छ । दीप गोलेले रचना गर्नुभएको सो गीतलाई रक्तिमका कलाकार हेमराज आश्रमले आवाज दिनुभएको छ ।
गीतको भिडिओमा गोलेले पार्टीका प्रकाशनहरू बिक्री वितरण गर्दै चेतना जगाउने काम गरिरहेको देख्न सकिन्छ । घरव्यवहारमा सिमित हुन आमाले गरेको आग्रहभन्दा माथि उठेर जनतालाई जगाउँदै हिँडेको भिडिओमा देख्न सकिन्छ ।
रक्तिम सांस्कृतिक अभियान रौतहटको यो पहिलो प्रस्तुतीलाई शनिबार काठमाडौंमा सार्वजनिक गरिएको हो । आश्रम पाठशालामा राष्ट्रिय सभाका सांसद तथा राष्ट्रिय जनमोर्चाका सल्लाहकार राजेश विश्वकर्माले सो एल्वम विमोचन गर्नुभयो ।
एल्बम विमोचन समारोहमा जनवादी गायक एवम् रक्तिमका पूर्वकलाकार चिरन पुन तथा अखिल नेपाल प्रगतिशील लेखक सङ्घका अध्यक्ष समीर सिंहले समीक्षा गर्नुभएको थियो ।
रक्तिमका महासचिव तथा सो गीतका गायक हेमराज आश्रमले सञ्चालन गर्नुभएको कार्यक्रममा अखिल नेपाल किसान महासङ्घका अध्यक्ष भैरव रेग्मी रअखिल नेपाल महिला सङ्घकी अध्यक्ष मिना पुनले शुभकामना दिनुभएको थियो ।
