काठमाडौं । यस वर्षको एसईई परीक्षा आगामी चैत पहिलो साताबाट सुरु हुने राष्ट्रिय परीक्षा बोर्डले जनाएको छ।
बुधबार शिक्षा पत्रकार सञ्जाल (इजोन) ले काठमाडौँमा आयोजना गरेको अन्तरक्रिया कार्यक्रममा बोल्दै बोर्डका अध्यक्ष डा. महाश्रम शर्माले संसदमा विचाराधिन अवस्थामा रहेको शिक्षा विधेयकमा कक्षा १० को परीक्षा उल्लेख नरहेकाले यो वर्ष एसईई हुने वा नहुने भन्ने अन्योल नराख्न आग्रह गरे ।
‘शिक्षा विधेयक संसदमा छलफलको क्रममै छ। त्यसैले बोर्डको निर्धारित तालिकाअनुसारै एसईई हुन्छ,’ उनले भने, ‘शिक्षा विधेयक संसदको पूँजी हो। यो विधेयक पास भएर कानुन नबनेसम्म एसईई परीक्षा रोकिँदैन। नियमित ढंगले हुन्छ।’
उनले एसईई परीक्षा सञ्चालनको लागि बोर्डले प्रदेश परीक्षा समितिसँग व्यवस्थापनको पहल गरेको जानकारी दिए।
शर्माले गत कात्तिक १९ गते जाजरकोट र रुकुम पश्चिममा गएको भूकम्पले एसईई परीक्षा प्रभावित तुल्याउने देखिएकाले आफूले केही दिनअघि मात्रै ती क्षेत्रको स्थलगत अनुगमन गरी फर्किएको बताए।
यस वर्षको लागि एसईई परीक्षामा सहभागी हुन ४ लाख ८९ हजार ४४४ जना विद्यार्थीले रजिस्ट्रेसन फारम भरेका बोर्डले जनाएको छ।
कार्यक्रममा परीक्षा नियन्त्रक नन्दलाल पौडेलले यो वर्ष पहिलो पटक नयाँ पाठ्यक्रमअनुसार परीक्षा हुने र विद्यार्थीले प्रत्येक विषयमा ३५ प्रतिशत अंक हासिल गर्नु पर्ने प्रावधान राखिएको जानकारी दिए। रासस
