काठमाडौं । काठमाडौँ मेडिकल कलेज (केएमसी)का सञ्चालक सुनिलकुमार शर्माले शिक्षामन्त्रीको निर्देशन अटेरी गरेका छन् ।
शिक्षामन्त्री अशोककुमार राईले आवासीय चिकित्सक डा. विशद दाहालमाथि गरेको निलम्बन फिर्ता गर्न काठमाडौँ विश्वविद्यालयलाई दिएको निर्देशनप्रति केएमसीका सञ्चालक शर्माले आपती जनाएका हुन्।
मन्त्री राईले काठमाडौँ विश्वविद्यालयको सहकुलपतिको हैसियतमा डा. दाहालमाथिको निलम्बन फिर्ता गर्न मंगलबार विश्वविद्यालयलाई निर्देशन दिएका थिए।
उनले प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा बोल्दै दाहालमाथिको कारबाही फुकुवा गर्न विश्वविद्यालयलाई निर्देशन दिएका थिए।
शिक्षामन्त्री राईले डा.दाहालमाथिको निलम्बन फिर्ता गर्न विश्वविद्यालयलाई निर्देशन दिएर पदको दुरुपयोग गरेको आरोप शर्माले लगाएका छन्। उनले शिक्षामन्त्री राईको निर्देशनविरुद्ध कानुनी उपचारको खोजी गर्ने पनि बताएका छन्।
दाहाललाई कलेजको नियम विपरित कार्य गरेकोमा निलम्बन गरिएको दाबी गर्दै शर्माले शिक्षामन्त्री राईले निलम्बन फुकुवा गर्न पत्राचार गर्नु पदको दुरुपयोग भएको दाबी गरेका हुन्।
‘आचरण विपरित कार्य गरेका एक जना विद्यार्थीलाई एक महिना निलम्बन गरेको विषयमा मन्त्रीजस्तो व्यक्तिले निलम्बन फुकुवा गर्न पत्र काट्नु गर्नु हास्यास्पद र लज्जास्पद विषय हो। शिक्षामन्त्रीको पत्रले हामीलाई कुनै फरक पर्दैन,’ शर्माले भने, ‘एउटा विद्यार्थीले आचरण विपरित कार्य गर्दा त्यसलाई बचाउन र संरक्षण गर्न शिक्षामन्त्री आफैं सक्रिय हुन्छन् भने त्यो हास्यास्पद विषय हो।’
निजी स्तरबाट सञ्चालित काठमाडौं मेडिकल कलेजले आवासीय चिकित्सकहरूलाई स्वास्थ्य शिविरका नाममा विभिन्न स्थानमा जबरजस्ती लैजाने गरेको भन्दै डा. दाहालले त्यसको प्रतिवाद गरेका थिए।
३ दिनअघि मात्रै शिविरमा गएर फर्किएका उनलाई अस्पतालले अर्को शिविर पठाएपछि उनले शिविरमा नजाने अडान लिएका थिए । त्यसपछि गत बिहीबार अस्पताल प्रशासनले उनलाई निलम्बन गरेको हो ।
डा. सुनिल शर्मा कांग्रेसका सांसद हुन् । शर्माले आफ्नो राजनीतिक फाइदाका लागि आवासीय चिकित्सकहरुको प्रयोग गरेको भन्दै उनीहरुले त्यसको प्रतिवाद गरेका हुन् । डा. दाहालले आवासीय चिकित्सकको नेतृत्व गरेका कारण अस्पतालले एक महिनाका लागि निलम्बन गरेको थियो ।
‘स्वास्थ्य शिविर सञ्चालन गर्ने कुरा नराम्रो होइन तर यहाँ व्यक्तिगत एजेन्डाका लागि शिविर सञ्चालन भइरहेको थियो। कोही मान्छेको राजनीतिक प्रचारप्रसार र दाउपेचका लागि हामी कतिञ्जेल प्रयोग हुने?’ डा. दाहालले प्रश्न गरे ।
यतिबेला उनको निलम्बन फुकुवाको माग गर्दै केएमसीको गेटअगाडि दैनिक चिकित्सकहरुले प्रदर्शन गर्ने गरेका छन् ।
