काठमाडौँ । सङ्घीय संसद्का निर्माणाधीन १२ भवनको काम द्रुत गतिमा भइरहेको छ ।
प्रतिनिधिसभा र राष्ट्रियसभाका लागि ठुला बैठक कक्षसहित सानाठुला गरी १२ भवन एकैसाथ बन्न लागेका हुन् ।
प्रतिनिधिसभा राज्यव्यवस्था तथा सुशासन समितिको टोलीले २०८० पुस २३ गते सोमबार सिंहदरबार परिसरमा निर्माणाधीन भवनको अवलोकन गरेको थियो ।
सो अवसरमा सहरी विकासमन्त्री सीता गुरुङले भवन निर्माणमा देखिएको चुनौती, समाधानका लागि गरिएका प्रयास र हालसम्मको प्रगतिबारे संसदीय टोलीलाई जानकारी गराउनुभयो ।
निर्माणाधीन सङ्घीय संसद्को हालसम्मको भौतिक प्रगति ७७ प्रतिशत पुगेको सो अवसरमा जानकारी दिइयो ।
अवलोकनका क्रममा मन्त्री गुरुङले आफूले मन्त्रालयको जिम्मेवारी सम्हालेसँगै पहिलो प्राथमिकता राखेर सङ्घीय संसद्को नयाँ भवन निर्माण अघि बढाएको बताउनुभयो ।
प्रतिनिधिभाको भुइँ तलाको भित्री निर्माण र प्लास्टरको काम अन्तिम चरणमा पुगेको तथा अरू कार्य भने तदारुकताका साथ अघि बढिरहेको छ ।
आयोजना निर्देशक मचाकाजी महर्जनका अनुसार आयोजनाको भौतिक प्रगति ७७ प्रतिशत पुगेको र पछिल्लो सम्झौताबमोजिम आगामी चैत १५ गतेसम्म भवन हस्तान्तरण गरिसक्नुपर्ने छ ।
अत्याधुनिक सुविधासम्पन्न र विश्वमै उत्पादन भएका नयाँ प्रविधि जडान गरिने भनिएको उक्त भवन निर्माण सहरी विकास तथा भवन निर्माण विभाग मातहतको विशेष भवन निर्माण आयोजना समन्वय कार्यालयबाट भइरहेको छ ।
