काठमाडौँ । जुत्ता र सडक बालकको कथामा “पाउलो” लघुचलचित्र तयार पारिएको छ ।

ऐना आर्टस्को प्रस्तुति र ब्ल्याक हर्स जुत्ता कम्पनीको सहयोगमा लघुचलचित्र “पाउलो” निर्माण भएको हो ।

निर्माताका अनुसार यो फिल्म लघुचलचित्र पशुपति परिसरमा बस्ने परिवारविहीन एक सडक बालकको कथा हो ।

यसमा सुरुदेखि अन्त्यसम्म मुख्य पात्र जुत्तालाई बनाइएको छ । मानिस जन्मन्छ† हुर्कन्छ† विवाह गर्छ† विवाहपश्चात् पति वा पत्नीको मृत्यु भयो भने उसले अर्को विवाह गरेका घटना समाजमा पाइन्छ । त्यस्तै मानिसको कथालाई बिम्बको रूपमा जुत्ताको जीवनकथा प्रस्तुत गरिएको छ ।

यहाँ कलाकार वा पात्रले जुत्तालाई हैन, जुत्ताले कथाका पात्रलाई घुमाइरहन्छ । त्यही जुत्ताले कसैलाई खुसी थपिदिन्छ त कसैलाई रुवाउछ वा समयानुसार उही मानिसलाई दुखी बनाइदिन्छ । लघुचलचित्र “पाउलो” मा पनि एउटा जीवन्त कथा र समाजको यथार्थ चित्रण रहेको निर्माताको दाबी छ ।

जुत्ता एउटा सामग्री मात्र हैन, मानवीय अनुभूति पनि हुन् भन्ने यस लघुचलचित्रको मुख्य सार रहेको छ ।

“पाउलो” को कथावस्तु जुत्तासम्बन्धी भएर आफूलाई राम्रो लागेकाले सहकार्य गरेको ब्ल्याक हर्स इन्ड्रस्टिज प्रालिका प्रबन्ध निर्देशक चीनबहादुर श्रेष्ठले बताए । ब्ल्याक हर्सले नेपालमा विभित्र ब्रान्डेड जुत्ताचप्पल उत्पादन तथा वितरण गर्दै आइरहेको छ ।

जुत्ताको कथावस्तु रहेको “पाउलो” को छायाङ्कन काठमाडौँको पशुपति परिसरमा गरिएको थियो ।

लघुचलचित्रमा प्रशान्त हुमागाइँ, सुवास सिलवाल, मोहन श्रेष्ठ, उद्धव दङ्गाल, नरेन भट्टराई, निश्चल कार्की, सम्पन्न दाहाल, लिजेश थापा र सन्देश थापाले अभिनय गरेका छन् ।

पाउलोमा रेनुका कार्कीको कास्टिङ डिरेक्सन र प्रोडक्सन म्यानेजमेन्ट चक्रप्रसाद पोख्रेलले गरेका छन् । सहायक निर्देशन करन साउदको रहेको छ । लघुचलचित्रको छायाङ्कन नारायण जिसीले गरेका हुन् र सम्पादन अनिलकुमार महर्जनले गरेका छन् । लघुचलचित्र पाउलोको लेखन तथा निर्देशन मोहन अभिलाषीले गरेका हुन् ।

अन्य चलचित्रमा व्यक्तिलाई पात्रको रूपमा उभ्याउने गरिएता पनि यस लघुचलचित्रमा भने जुत्तालाई नै मुख्य पात्र र जीवनको रूपमा उतार्ने प्रयास गरिएको उनी बताउँछन् । उनले यसअघि निर्माण गरेका लघुचलचित्र ‘भाउ’, ‘घुर्रा’, ‘द स्कुल वाल’ विभिन्न अन्तर्राष्ट्रिय चलचित्र महोत्सवमा समेत छनोट भएर विभिन्न देशमा प्रदर्शनसमेत भइसकेको छ ।

“पाउलो” को पात्रका लागि स्पार्कल आर्ट एकेडेमीमा अडिसनमार्फत कलाकारको छनोट गरिएको थियो ।

मुख्य पात्रको रुपमा अभिनय गरेका प्रशान्त हुमागाइँ यस लघुचलचित्रबाट अभिनयबारे अझ धेरै कुरा सिक्ने अवसर पाएको बताउँछन् ।

पात्रमा अभिनय गरिरहँदा मानिसहरू झुक्किएर पैसा दिएको अनुभवसमेत सुनाए । उनले नाटकमार्फत बेलारुस र बङ्गलादेश पुगेर उत्कृष्ट बाल कलाकारको अवार्डसमेत प्राप्त गरिसकेका छन् ।