काठमाडौँ । काठमाडौँको कालिकास्थानस्थित सर्वनाम थिएटरमा नाटक “कुमारजी आज्ञा गर्नुहुन्छ” मञ्चन भइरहेको छ ।

साहित्यकार तथा रङकर्मी अशेष मल्लको लेखन रहेको नाटक सर्वनामको उन्निसौँ ब्याचका विद्यार्थीले प्रस्तुत गरेका हुन् ।

नाटकमा ब्याचका प्रशिक्षार्थीद्वय रसिक राज र शीतल थोकरको निर्देशन रहेको छ । रङमञ्चमा समूहको यो पहिलो नाट्य यात्रा हो ।

महिला तथा बालबालिकामा हुने हिंसाको विषयमा केन्द्रित रहेको नाटकले आँखैअगाडि हिंसा हुँदा पनि चुपचाप रहने समाजको प्रवृत्तिमाथि व्यङ्ग्य गरेको छ । मिथकीय पात्र गोमालाई प्रतिनिधि पात्रका रूपमा उतारेर समाजमा अनगिन्ती महिला तथा बालबालिका हिंसाको सिकार बन्नुपरेको तितो सत्यबारे नाटक बोलेको छ ।

कथाको लयसँग दृश्यमा अभिनयमा निकै बलियो उपस्थिति जनाएको छ । अभिनय, बिम्ब, प्रयुक्त प्रप्स, प्रकाश, चित्रकला र सङ्गीतको निकै सशक्त प्रस्तुति देख्न सकिन्छ । नाटकभित्र मिथक र समकालीन समयको संयोजन छ ।

स्वस्थानी ब्रतकथामा सात वर्षीया गोमाको विवाह ७० वर्षीय वृद्धसँग भएको प्रसङ्गलाई लिएर आजको समयसँग यसको लेखाजोखा गरिएको छ । वर्तमानलाई मिथकसँग जोडिरहन सूत्रधार (रसिक राज) मार्फत गरिएको संवादले दर्शक दुवै समयप्रति सचेत बनिरहन्छन् ।

‘गोमा कहाँ छिन् ?’ भनेर प्रश्न गर्दै गर्दा गोमालाई इङ्गित गदै आम दर्शकतिर गरिएको इशाराले सिङ्गो समाजलाई प्रतिनिधित्व गरिएको छ ।

नाटक हेरेर सामाजिक सञ्जालमा मिसन अधिकारी लेख्छन्– ‘यो नाटकले गम्भीर दर्शकको माग गर्दछ । नाटक हेरिरहँदा कतै ऐनामा आफ्नै अनुहार त आउँदैन भन्ने भय दर्शकमा पैदा हुन्छ । मनोरञ्जनको लागि मात्र नभएर आफ्नै परिवार, आफ्नै समाजको अँध्यारो पक्षसित परिचित हुन नाटकले अपिल गर्छ । आफैँसित संवाद गर्नलाई हेर्ने हो यो नाटक ।’

नाटक हेरेपछि दर्शक सरलविक्रम शाह भन्छन्– ‘यो नाटकले म स्वयम् नै यो नाटकको पात्र हु भन्ने महसुस गराउँछ । पात्रको परिचय गराउने तरिका निकै नवीन छ । गोमा पात्र अचानक दर्शकबाट उठ्दा निकै तरङ्गित महसुस हुन्छ । नाटकले आफूलाई कोट्याउन बाध्य पार्छ ।’

नाटकमा सान्सिक प्रोडक्सनको सङ्गीत, निर्मला घिसिङको स्वर, एलिसा तामाङको कोरियोग्राफी र मनोज भण्डारी, सुरज, रसिक तथा शीतलको गीत रहेको छ ।

नाटकमा रसिक राज, शीतल थोकर, सुरज पराजुली, आकाश झा, वाइएस पौडेल, बिलबहादुर विक, सुरज अधिकारी, सरस्वती दाहाल, आरुषजङ्ग सारूमगर, शू गूँ, एलिसा तामाङ, युनिशा खनाल र विवेक भुसालको अभिनय रहेको छ ।

नाटकले अन्याय विरुद्ध गर्जिनुपर्छ र स्वअस्तित्वको लडाइँ लड्नुपर्छ भन्ने सन्देश छोडेको छ ।

चित्रकला, गीतसङ्गीत र नृत्यको कुशल संयोजन रहेको नाटक पुस १५ गतेसम्म बिहीबारबाहेक हरेक साँझ ५ बजे र शनिबार दिउँसो १ बजे पनि मञ्चन हुने छ ।

पुस ८ गतेबाट मञ्चन भइरहेको नाटकले दर्शकबाट राम्रो साथ पाइरहेको छ ।