काठमाडौं । सहिद गंगालाल राष्ट्रिय हृदय केन्द्रका शल्यचिकित्सक डा. रामेश कोइरालाले अस्पतालमा भएको राजनीतिक हस्तक्षेपप्रति दिक्दारी व्यक्त गरेका छन् । डा. कोइरालाले सामाजिक सञ्जालमार्फत राजीनामा दिने संकेत गरेका छन् ।
शुक्रबार राति सामाजिक सञ्जालमा स्ट्याटस लेखेर अस्पतालमा राजनीतिक हस्तक्षेपप्रति असन्तोष प्रकट गर्दै राजीनामा दिन लागेका बताएका हुन् ।
उनले लेखेका छन्,‘देशमा स्वास्थ्य र शिक्षा सरकारको दायित्व हो भन्न म मन नपरीकन पनि कसोकसो सरकारीबाट राजीनामातिर पुग्दैछु। मेरो भान्साबारे चिन्तै गरेर दण्डवत्को हैसियतमा त छुइनँ नै। सरी गंगालाल र धन्यवाद भाउजू ! जय नेपाल !’
आफ्नो स्ट्याटसमा कुनै व्यक्तिबारे नबोलेपनि उनले ‘भाउजु’ भनेर नेपाली कांग्रेसका सभापति शेरबहादुर देउवाकी पत्नी आरजु राणाप्रति संकेत गरेका छन् ।
उनको यस सन्देशलाई लिएर धेरैले चिन्ता र सहानुभूति दर्शाएका छन्।
त्यसमा उनले जवाफ फर्काउँदै भनेका छन्, ‘सिधै महामन्त्रीद्वयलाई भनियो, यो ताण्डवको विपक्षमा हैनौ भने तिमीहरूको हैसियत के ? म त घर जसरी पनि चलाउँछु, तर तिमेरले देश चलाउन्नौ !’
अर्थात् गंगालालमा भइरहेको राजनीतिक हस्तक्षेपबारे कांग्रेस महामन्त्री गगन थापा र विश्वप्रकाश शर्मालाई भनेको तर, उनीहरुले निरीहता प्रकट गरेको डा. कोइरालाको संकेत छ ।
देशमा स्वास्थ्य र शिक्षा सरकारको दायित्व हो भन्न्ने म मन नपरीकन पनि कसो कसो सरकारीबाट राजिनामातिर पुग्दैछु। मेरो भान्साबारे चिन्तै गरेर दण्डवतको हैसियतमा त छुइँन नै। सरी गंगालाल र धन्यवाद भाउजू! जय नेपाल!
— रामेश (@RaameshKoirala) December 22, 2023
