काठमाडौँ । डा. गोविन्द केसीले २०८० मङ्सिर २९ गते शुक्रबार साँझ ५ बजेदेखि तीन दिने सत्याग्रह सुरु गर्ने भएका छन् ।
आजै काठमाडौँमा पत्रकार सम्मेलन गर्दै उनले यस्तो घोषणा गरेका हुन् ।
उनले सरकारले गरेका सहमति कार्यान्वयन नगरेको भन्दै सत्याग्रह सुरु गर्ने बताए । गत लामो समयदेखि मुद्दा उठाएर सत्याग्रह बसे पनि सरकारले माग पूरा नगरेको उनको आरोप छ ।
उनले भने– ‘यो अवस्थामा अन्यायमा पर्ने नागरिकका लागि बोल्नु र दण्डहीनता अन्त्य गर्नु हाम्रो कर्तव्य बन्न जान्छ । विगत लामो समयदेखि यी मुद्दा उठाएर हामीले सत्याग्रहसमेत गर्दै आएका छौँ तर पनि अवस्था परिवर्तन भएको छैन । त्यसैले जवाफदेही बनाउनका लागि हामीले देहायका मागसहित मङ्सिर २९ गते साँझ ५ बजेदेखि तीन दिने सत्याग्रह सुरु गर्ने घोषणा गर्दछौँ ।’
केसीले सरकारी अस्पतालमा मागअनुसार दरबन्दी थप गर्दै क्षमता बढाउने र सबै नि:शुल्क औषधी पाइने सुनिश्चित गर्ने, गेटामा शीघ्र स्वास्थ्य विज्ञान प्रतिष्ठान सञ्चालनमा ल्याउने, चिकित्सा शिक्षा ऐनमा उल्लेख भएअनुसार सबै प्रदेशमा कम्तीमा एउटा सरकारी मेडिकल कलेज पुर्याउने, जनसङ्ख्या र भौगोलिक अवस्थितिअनुसार यस अगाडि आफूसँग भएका सम्झौताअनुसार इलाम, उदयपुर, डडेलधारामा सरकारी मेडिकल कलेज खोल्ने, सय शैयाभन्दा बढी क्षमता भएका एका सरकारी अस्पतालमा नर्सिङलगायत अन्य स्वास्थ्यसम्बन्धी विषयका कार्यक्रम सुरु गर्ने माग अगाडि सारेका छन् ।
त्यस्तै, विश्वविद्यालय र प्रतिष्ठानमा पदाधिकारी नियुक्तिको मापदण्डसहित कानुनी व्यवस्था गर्ने, ऐन जारी नहुँदासम्म दलीय भागबण्डा निषेध गर्दै आफूसँग यस अगाडि सम्झौता भएबमोजिमका मापदण्डअनुसार तुरुन्त विश्वविद्यालयमा नियुक्ति गर्ने, एकीकृत प्रतिष्ठान ऐन शीघ्र जारी गर्न र सबै सरकारी नियुक्तिमा स्वार्थको द्वन्द्व अन्त्य गर्नका लागि कानुनी व्यवस्था गर्न माग गरेका छन् ।
