काठमाडौं । कोरोना भाइरस (कोभिड–१९) को जोखिम रोकथाम र नियन्त्रणको लागि नेपाल सरकारले घरबाट ननिस्कन आदेश जारी गरेको सन्दर्भमा नेपाल टेलिकमले मोबाइल सेवाकोे प्रयोगलाई सहज तुल्याउन रिचार्जमा शतप्रतिशत बोनस घोषणा गरेको छ ।

टेलिकम प्रवक्ता राजेश जोशीद्वारा आज जारी प्रेस विज्ञप्तिमा उक्त व्यवस्था भोलि बिहिबारदेखि ७ दिनका लागि लागू हुनेछ । टेलिकमको जीएसएम तथा सिडिएमएको प्रिपेड तथा पोस्टपेड सेवामा रिचार्ज कार्ड वा एमपोसबाट रिचार्ज गर्दा रिचार्ज गरेको रकमको शतप्रतिशत बराबर बोनसको रूपमा प्राप्त हुनेछ । वोनस रकमबाट टेलिकमको नम्बरमा कल गर्न, एसएमएस पठाउन तथा डाटा प्रयोग गर्न सकिन्छ भने ब्यालेन्स ट्रान्सफर गर्न वा प्याकेज खरिद गर्न वा गिफ्ट पठाउन भने सकिने छैन ।

रिचार्ज कार्ड प्रयोग गरी ५० र १०० रुपैयाँको रिचार्ज गर्दा प्राप्त हुने वोनस रकम २ दिन भित्र खपत गरिसक्नु पर्छ भने २०० र ५०० रुपैयाँको रिचार्जमा प्राप्त हुने वोनस रकम ४ दिनभित्र खपत गरिसक्नु पर्नेछ । टेलिकमका अनुसार, १००० रुपैयाँको रिचार्जमा प्राप्त हुने वोनस रकम ६ दिनभित्र खपत गरिसक्नु पर्नेछ ।

एमपोस वा विद्युतीय रिचार्जअन्तर्गत १० देखि ९९ रुपैयाँसम्मको रिचार्जमा प्राप्त हुने वोनस २ दिनभित्र, १०० देखि ४९९ रुपैयाँसम्मको रिचार्जमा प्राप्त हुने वोनस ४ दिन भित्र र ५०० देखि ९९९ रुपैयाँ सम्मको रिचार्जमा प्राप्त हुने वोनस ८ दिनभित्र खपत गर्नुपर्नेछ । १००० रुपैयाँ वा सो भन्दा माथिको रिचार्जमा प्राप्त हुने वोनस १० दिनभित्र खपत गरिसक्नु पर्ने विज्ञप्तिमा उल्लेख छ ।

एनसेलले ५० प्रतिशत बोनस दिने
यस्तै, निजी क्षेत्रको दूरसञ्चार प्रदायक कम्पनी एनसेलले ५० प्रतिशत बोनस दिने भएको छ । बुधबार विज्ञप्ति जारी गर्दै रिचार्जमा ५० प्रतिशत बोनस दिने घोषणा गरेको हो । एनसेलका अनुसार उक्त आधा बोनस सोही दिनको मध्यरातिसम्मको लागि मात्र मान्य हुनेछ।

‘एनसेलले हरेक रिचार्जमा ५० प्रतिशतसम्म बोनस पाइने योजना ल्याएको छ’, विज्ञप्तिमा भनिएको छ, ‘यो योजनाअन्तर्गत एनसेलका ग्राहकले रु ५०, रु १००, रु २००, रु ३००, रु ५०० र रु १००० को रिचार्जमा ५० प्रतिशत बोनस प्राप्त गर्न सक्नेछन्।’

प्राप्त बोनस रकम एनसेल नेटवर्कभित्र कल गर्न, एसएमएस गर्न र इन्टरनेट चलाउन प्रयोग गर्न सक्नेछन्। बोनस रकम सोही दिनको मध्य रातिसम्म मान्य हुनेछ। आधार बोनस मात्र दिएको एनसेलले सापटी भने २ सय पु-याएको छ।

एनसेलका ग्राहकले विगतमा यो सेवा प्रयोग गरेको व्यवहारको आधारमा न्यूनतम रु ४० देखि अधिकतम रु २०० सम्म
सापटी लिन सक्नेछन् ।

एनसेलले उपभोक्तालाई दिने आधा बोनस र सोही दिनको लागि मात्रको निर्णय नियामक निकायको निर्देशनविपरीत देखिन्छ। मंगलबार नेपाल दूरसञ्चारप्राधिकरणको सञ्चालक समिति बैठकले सम्पूर्ण दूरसञ्चार सेवा प्रदायकलाई एक महिनाको लागि रिचार्जबराबरको बोनस र लोनको सीमा २ सय रुपयै पु-याउने निर्देशन दिएको थियो ।