दाङ । राष्ट्रिय जनमोर्चा घोराही नगर समितिले देउसी भैलोबाट २ लाख ४३ हजार ९७० रुपैयाँ संकलन गरेको छ ।
गत तिहारमा खेलिएको प्रगतिशील देउसी, भैलोबाट सो रकम संकलन भएको राजमो घोराहीले जनाएको छ ।
शुक्रबार राजमो जिल्ला सम्पर्क कार्यालय घोराहीमा आयोजित देउसी भैलो समीक्षा कार्यक्रममा सो जानकारी दिइएको हो ।
भैलो परिचालन समितिका संयोजक हरी खरेलले २५० घरमा देउसी भैलो खेलिएको, जसबाट २ लाख ४३ हजार ९७० रुपैयाँ आम्दानी भएको र खर्च रकम ७४ हजार ९७० रुपैयाँ कटाएर १ लाख ६९ रुपैयाँ बचत गरिएको जानकारी दिनुभयो ।
समीक्षा कार्यक्रममा देउसी भैलो उत्साहजनक रुपमा सम्पन्न भएको र जनताकोबीचमा चेतना जागरण गराउन सफल भएको समीक्षा गरिएको छ ।
कार्यक्रममा अखिल नेपाल युवक संघका पूर्वकेन्द्रीय अध्यक्ष काशिनाथ पोख्रेल राष्ट्रिय जनमोर्चाका केन्द्रीय सदस्य तथा जिल्ला अध्यक्ष गणेश आचार्य, राजमो जिल्ला सदस्य चन्द्रबहादुर रावत, सल्लाहकार खडानन्द खनाल, प्युठान जिल्ला सदस्य देवा पोख्रेल, घोराही नगर कोषाध्यक्ष झबिलाल कालाथोकी, अखिल नेपाल ट्रेड युनियन महासंघ (अन्टुक) जिल्ला सचिव तुलसी पन्थी, राजमो नगर सदस्य रोमप्रसाद पोख्रेल लगायतले मन्तव्य राख्नु भएको थियो ।
झबिलाल कालाथोकीको स्वागत मन्तव्यबाट सुरु भएको कार्यक्रमको सहजीकरण नगर अध्यक्ष मनिराम खनालले गर्नु भएको थियो ।
