काठमाडौं । कोरोनाको त्रासका कारण भारतका विभिन्न शहरबाट घर फर्केका सयौं नेपाली सिमानाका बन्द भएपछि सीमा क्षेत्रमै अलपत्र परेका छन् । उनीहरु भारत र नेपाल दुवैतर्फ लकडाउन भएको र सुरक्षाकर्मीले नेपाल प्रवेश गर्न नदिएपछि दशगजा क्षेत्रमा अलपत्र परेका हुन् ।
कैलालीको धनगढीस्थित गौरिफन्टा नाकामा हिजोदेखि अलपत्र परेका सयौं नेपाली मंगलबार बिहान जबरजस्ती नेपाल प्रवेश गर्न खोज्दा सुरक्षाकर्मीसँग झडप भएको छ । आजदेखि देशभर लकडाउनको घोषणा गरेको सरकारले नाकाबाट भित्रिन नदिन निर्देशन दिएको छ ।
तर गौरीफन्टा नाकामा रोकिएकामध्ये केहीले ढुंगामुढा गरेपछि प्रहरीले सामान्य बल प्रयोग गरेको स्थानीय प्रशासनको भनाई छ । सीमामा रोकिएका नेपालीलाई घर पठाउन गृह मन्त्रालयको आदेश पर्खिएको जिल्ला प्रशासन कार्यालय कैलालीले जनाएको छ ।
सरकारले मंगलवारदेखि निषेधाज्ञा गरे पनि जिल्ला प्रशासन कार्यालय कैलालीले सोमबार दिउँसो २ बजेदेखि नै लागू हुने गरी जिल्लाभर निषेधाज्ञा जारी गरेको थियो ।
निषेधाज्ञाको समयमा भारतबाट फर्किएका तीन सय नेपाली गौरीफन्टा नाकामा रोकिएका छन्। अहिले गौरीफन्टा नाका बाँक्लो संख्यामा नेपाल प्रहरी, शसस्त्र प्रहरी परिचालन गरिएको छ ।
यता, भारतबाट घर फर्किएका सयौँ नेपाली पश्चिमी सिमानाका भारतीय सहर बनबासामा रोकिएका छन् । उनीहरु नेपाल प्रवेश गर्ने आशमा सीमा क्षेत्रमा पर्खेर बसिरहेका छन् ।
सोमबार गड्डाचौकी नाकामा रोकिएका सयौँ नेपालीलाई साँझ स्थानीय प्रशासनले नेपाल प्रवेश गर्न दिएको थियो ।
कोरोना भाइरसको संक्रमण बढ्दै गएपछि मंगलबार भारतमा पनि ३० राज्यका पाँच सय ४८ जिल्ला लकडाउन छ।
