काठमाडौँ । अन्तर्राष्ट्रिय पत्रकार महासङ्घ (आइएफजे) ले नेपाल पत्रकार महासङ्घलाई कारबाही गर्ने भएको छ ।
नेपाली पत्रकारहरूको छाता संस्था महासङ्घलाई सदस्यता शुल्कवापत्को रकम नबुझाएका कारण आइएजेले आफूसँगको आबद्धतालाई एकतर्फी रूपमा तोड्ने प्रक्रिया अघि बढाएको हो ।
आइएफजेलाई महासङ्घले करिब दुई लाख नेपाली रुपैयाँ तिर्नुपर्ने छ । सदस्यताबापतको उक्त रकम कोषाध्यक्ष कलेन्द्र सेजुवालले तिर्न नमानेपछि महासङ्घ आइएफजेको सदस्यबाट हट्ने अवस्था आएको बताइएको छ ।
महासङ्घका एक सदस्यका अनुसार आइएफजेलाई पठाउनुपर्ने चेकमा कोषाध्यक्ष सेजवालले हस्ताक्षर नगर्ने अड्डी लिएपछि समस्या उत्पन्न भएको हो ।
आइएफजेले महासङ्घलाई पत्र लेख्दै सदस्यताबाट हटाउने प्रक्रियाका बारेमा जानकारी गराइसकेको छ । आइएफजेले महासङ्घलाई उपलब्ध गराएको समावेशिता र नेतृत्व विकाससँग सम्बन्धीत कार्यक्रमसमेत राम्रोसँग नगरेको भन्दै थप कार्यक्रममाथि रोक लगाएको छ ।
महासङ्घले आइएफजेलाई पठाएको आर्थिक प्रतिवेदनमाथि प्रश्न उठेको बताइएको छ ।
कोषाध्यक्ष सेजवालले चेकमा रकम पठाउन नमान्नुमा खास कारण नरहेको बताइएको छ । महासङ्घ स्रोतका अनुसार सेजवालले आर्थिक गतिविधि आफूखुसी गर्दै आएकाले पारदर्शिताको माग हुँदै आएको छ ।
