काठमाडौँ । मकवानपुरको चित्लाङ केन्द्रविन्दु भएर भूकम्पको परकम्प गएको छ । राष्ट्रिय भूकम्प मापन तथा अनुसन्धान केन्द्रका अनुसार गए राति १ बजेर १९ मिनेटको समयमा ४ दशमलव ५ रेक्टर स्केलको परकम्प गएको हो ।
केन्द्रका वरिष्ठ भूकम्पविद् डा लोकविजय अधिकारीले काठमाडौँ, मकवानपुर र धादिङ गरी तीनवटै जिल्लाको सिमानामा पर्ने चित्लाङमा परकम्प गएको जानकारी दिए । परकम्प काठमाडौँ नजिक भएकाले आसपास जिल्लामा ठूलो धक्का महसुस गरिएको उनले उल्लेख गरे ।
काठमाडौँसहित धादिङ, मकवानपुरमा परकम्पको ठूलो धक्का महसुस गरिएको थियो । यसअघि मङ्सिर ४ गते बझाङको धमेना केन्द्रविन्दु भएर ४ दशमलव ५ रेक्टरस्केलको परकम्प गएको थियो ।
भूकम्पविद् डा. लोकविजय अधिकारीका अनुसार बुधबार राति गएको भूकम्प गोरखा (२०७२ को) भूकम्पको परकम्प हो ।
२०७२ वैशाख १२ गते गोरखाको बारपाक केन्द्रबिन्दू भएर ७.८ रेक्टर स्केलको भूकम्प जाँदा हजारौँ जनाको मृत्यु भएको थियो भने लाखौं घर भत्किएका थिए। उक्त भूकम्पको पराकम्प बेला बेलामा गइरहेको छ ।
