बागलुङबजार । ढोरपाटन नगरपालिका वडा नं. ६ मा राष्ट्रिय जनमोर्चाको अन्तरक्रिया सम्पन्न भएको छ ।
राजमो वडा समितिको आयोजनामा २०८० मङ्सिर ५ गते मङ्गलबार गाडिखोला सामुदयिक भवनमा उक्त कार्यक्रम सम्पन्न भएको हो ।
“राष्ट्रियता, गणतन्त्र, धर्मनिरपेक्षताको रक्षा : सङ्घीयता खारेजी अहिलेको राष्ट्रिय आवश्यकता” विषयक उक्त कार्यक्रमको प्रमुख अतिथि अखिल नेपाल टे«ड युनियन महासङ्घ (अन्टुक) का केन्द्रीय सदस्य केरसिंह अदै हुनुहुन्थ्यो ।
कार्यक्रममा मन्तव्य राख्दै अदैले राष्ट्रियता, गणतन्त्र, धर्मनिरपेक्षताको रक्षा र सङ्घीयता खारेजीको बारेमा राजमोको धारणा तथा सङ्घर्षको बारेमा धारणा राख्नुभएको थियो ।
कार्यक्रममा उठेका प्रश्नको जवाफ दिँदै उहाँले राष्ट्रियता, गणतन्त्र र धर्मनिरपेक्षता रक्षा र सङ्घीयता खारेज गर्न सबै एकजुट हुनुपर्ने आवश्यकतामा जोड दिनुभएको थियो ।
उहाँले यी विषय सम्पूर्ण नेपाली जनताको मुद्दा भएको पनि बताउनुभयो ।
राजमो वडा नं. छ का अध्यक्ष सहबहादुर छन्त्यालको अध्यक्षतामा अघि बढेको सो कार्यक्रममा राजमोका निर्वाचित वडासदस्य ज्ञानबहादुर भण्डारी र निमकुमारी भण्डारीको पनि आतिथ्य रहेको थियो ।
कार्यक्रमको सञ्चालन अखिल नेपाल शिक्षक सङ्घ बागलुङका उपाध्यक्ष दुर्गाबहादुर भण्डारीले तथा स्वागत मन्तव्य वडासदस्य ज्ञानबहादुर भण्डारीले गर्नुभएको थियो ।
त्यसैगरी ढोरपाटन नगरपालिका वडा नं. ७ मा पनि राजमोका निर्वाचित वडाअध्यक्षको पहलमा वडाका अगुवा समाजसेवीमाझ छलफल भएको सूचना प्राप्त भएको छ ।
सो अवसरमा यस क्षेत्रका जातजाति, भाषाभाषी, समाज बढ्दै गइरहेका विकृति, अन्धविश्वासले पारेको असर आदिको बारेमा छलफल भएको थियो ।
त्यस्तै, ढोरपाटन नगरपालिका वडा नं. ५ मोराङमा पनि सो गाउँका अगुवा, समाजसेवी, भूपू अध्यक्षमाझ छलफल भएको थियो ।
सो छलफलमा गाउँको इतिहास तयार पार्ने विषयले प्रवेश पाएको जानकारी प्राप्त भएको छ ।
