देहरादुन (भारत) । दस दिनदेखि भत्किएको सुरुङमा फसेका ४१ भारतीय कामदारलाई मङ्गलबार पहिलोपटक क्यामेरामा जीवित देखिएको छ । उद्धारकर्मीले उनीहरूलाई सुरुङबाट बाहिर निकाल्नका लागि नयाँ बाटो बनाउने प्रयास गरिरहेका छन् ।
प्रस्तावित मार्गमध्ये एउटा करिब आधा किलोमिटर लामो छ । थकित र चिन्तित देखिएका तथा बाक्लो दाह्री भएका पुरुषलाई उद्धारकर्मीले अक्सिजन, खाना र पानी पठाइने पातलो पाइपबाट तल पठाइएको इन्डोस्कोपिक क्यामेरामा हेरिरहेको देख्न सकिन्छ ।
सरकाले जारी गरेको भिडियोमा देखाइएको छ– “हामी तपाईंहरूलाई सुरक्षित बाहिर ल्याउने छौ्रँ । चिन्ता नगर्नुहोस्’ उद्धारकर्मीले क्यामेरानजिक एकत्रित भएका सुरुङभित्र फसेका हेलमेट लगाएका मानिसलाई भनेको सुन्न सकिन्छ ।
सुरुङको एक भाग भत्किएपछि एक्साभेटरले गत कात्तिक २६ गतेदेखि उत्तरी हिमाली राज्य उत्तराखण्डमा निर्माणाधीन सुरुङबाट माटो, कङ्क्रिट र भग्नावेशष निकालिरहेका छन् । निरन्तर खसेको भग्नावशेषका साथै महत्त्वपूर्ण भारी ड्रिलिङ मेसिन बारम्बार बिग्रँदा वायुसेनाले नयाँ उपकरणमा दुईपटक एयरलिफ्ट गर्नुपर्दा उद्धार प्रयास सुस्त भएको छ ।
क्यामेरा सुरु हुनुअघि उद्धारकर्मीले रेडियो प्रयोग गरेर भित्रका मानिससँग कुराकानी गरिरहेका थिए ।
‘सबै कामदार पूर्णतया सुरक्षित छन्’ उत्तराखण्डका मुख्यमन्त्री पुष्कर सिंह धामीले एक विज्ञप्तिमा भन्नुभयो– ‘उनीहरूलाई सुरक्षित छिट्टै बाहिर निकाल्न हामीले पूरा प्रयास गरिरहेका छौँ ।’
उहाँले सङ्कटका बारेमा प्रधानमन्त्री नरेन्द्र मोदीसँग कुरा गरेको बताउनुभयो । प्रधानमन्त्री मोदीले कामदारलाई बाहिर निकाल्नु राज्य सरकारको ‘उच्च प्राथमिकता’ हुनुपर्ने बताउनुभएको उहाँले जानकारी दिनुभयो । (रासस/एएफपी)
