काठमाडौँ । नेकपा (मसाल) ले मङ्सिर ७ गते आयोजित राजावादीको कार्यक्रमबाट देशमा प्रतिगमनको खतरा बढ्दै गएको प्रमाणित भएको ठहर गरेको छ ।
महामन्त्री मोहनविक्रम सिंहको हस्ताक्षरमा २०८० मङ्सिर ५ गते जारी प्रेसवक्तव्यमार्फत् पार्टीले यस्तो धारणा व्यक्त गरेको हो ।
प्रेसवक्तव्यमा पार्टीले प्रतिगमनको विरुद्ध राष्ट्रिय एकता तथा सशक्त सङ्घर्ष आजको आवश्यकता रहेको पनि औल्याएको छ ।
त्यस्तै, वक्तव्यमा शाहवंश, राणाशासन र पञ्चायती शासन गणतन्त्रको विकल्प हुन नसकेको स्पष्ट पार्दै प्रतिगामी खतराका विरुद्ध सङ्घर्षका साथै देशलाई अग्रगमनतर्फ अघि बढाउनुपर्ने आवश्यकतामा जोड दिएको छ ।
यस्तो छ प्रेसवक्तव्यको पूर्ण पाठ :
“जनआन्दोलनका उपलब्धिहरू गणतन्त्र र धर्मनिरपेक्षतासमेतका विरुद्ध गम्भीर खतरा भएको कुरामा हाम्रो पार्टीले लगातार जोड दिँदै आएको छ । नेपालका प्रतिगामी शक्तिका पक्षमा निर्णय गराउनका लागि भारतका कट्टरपन्थी हिन्दु शासक वर्गले पनि नेपालका विभिन्न राजनीतिक पार्टीमाथि दबाब दिँदै आएका छन् । त्यही प्रकारको पृष्ठभूमिमा नेपालका राजावादीले मङ्सिर ७ गते राजधानीमा विरोध प्रदर्शनको कार्यक्रम आयोजना गरेका छन् । त्यो कार्यक्रमबाट नेपालमा प्रतिगमनको खतरा बढ्दै गएको कुरा प्रमाणित भएको छ । त्यो अवस्थामा हाम्रो पार्टीले प्रतिगमनका विरुद्धको राष्ट्रिय एकता तथा सशक्त सङ्घर्ष गर्नुपर्ने आवश्यकतामा विशेष जोड दिन्छ ।
हामीलाई यो कुरामाथि पूरा विश्वास छ कि प्रतिगमन विरोधी शक्तिको एकता वा गठबन्धनद्वारा नेपाली जनताको करिब एक सय वर्ष लामो सङ्घर्ष र बलिदानद्वारा प्राप्त ऐतिहासिक उपलब्धिको रक्षा हुने छ र हुनु पनि पर्दछ ।
आज देशमा बढिरहेको कुशासन, भ्रष्टाचार, बिग्रदै गएको अर्थतन्त्र तथा देशको राष्ट्रियता र अखण्डतामाथि बढ्दै गएको खतराप्रति हाम्रो ध्यान छ र हाम्रो पार्टीले तिनीहरूका विरुद्ध सङ्घर्षमा जोड दिँदै आएको छ तर उक्त कारणले देशलाई प्रतिगमनको दिशामा लैजाने कुनै पनि प्रयत्न सही हुने छैन र त्यसबाट देश र जनताका समस्याको समाधान हुनेभन्दा देश झन् विनाशको बाटोमा जाने छ । शाहवंश, राणाशासन र पञ्चायती शासनसमेतको इतिहासमाथि विचार गर्दा कुनै पनि प्रतिगामी व्यवस्थाद्वारा देश र जनताको हित हुन नसक्ने कुरा निश्चित छ । त्यसैले हामीले प्रतिगामी प्रयत्नका विरुद्ध सम्झौताहीन सङ्घर्ष गर्दै देशलाई अग्रगमनको दिशामा बढाउन सम्पूर्ण न्यायप्रेमी जनताको ध्यान आकर्षित गर्न चाहन्छौँ ।”
