जेरुसेलम । हमासको कमान्ड सेन्टरलाई निशाना बनाउँदै इजराइली सेनाले बुधबार गाजाको सबैभन्दा ठुलो अस्पतालमा प्रवेश गरेको छ ।
हजारौँ बिरामी र आश्रय लिएका नागरिकहरू रहेको उक्त अस्पतालमुनि हमासको कमान्ड सेन्टर रहेको सेनाले दाबी छ ।
इजराइली र प्यालेस्टाइनी अधिकारीहरूले गाजा सहरको अलशिफा अस्पतालमा सैन्य कारबाही भइरहेको बताएका छन् । इजराइल डिफेन्स फोर्स (आइडिएफ) ले आफ्नो सेनाले उक्त अस्पतालको निर्दिष्ट क्षेत्रमा हमास विरुद्ध सटिक र लक्षित कारबाही गरिरहेको बताएको छ ।
अस्पतालभित्र रहेका हमासद्वारा सञ्चालित स्वास्थ्य मन्त्रालयका अधिकारी युसेफ अबुल रेसले अस्पताल परिसरभित्र ट्याङ्क तथा आकस्मिक र स्वागत भवनमा दर्जनौँ सैनिक र कमान्डोलाई देख्न सकिने एएफपीलाई बताएका छन् ।
अलशिफा अस्पताललाई सुरक्षित गरिनुपर्छ भन्ने अमेरिकाको कडा चेतावनीपछि इजराइलले गुप्तचर सूचना र अपरेसनल आवश्यकताका आधारमा छापा मारिएको बताएको छ ।
स्थानीय अधिकारीका अनुसार हजारौँ बिरामी, कर्मचारी तथा विस्थापित सर्वसाधारण उक्त अस्पताल परिसरभित्र रहेका छन् ।
प्रत्यक्षदर्शीले अस्पताल परिसरको अवस्थालाई भयावहका रूपमा वर्णन गरेका छन् । एनेस्थिटकबिना नै चिकित्सा प्रक्रिया भइरहेको भन्दै उनीहरूले खानेकुरा तथा पानीको अभाव भएका परिवार कोरिडोरमा बस्ने गरेका र सडेका शवका दुर्गन्ध फैलिरहेको बताएका छन् ।
अस्पतालका निर्देशक मोहम्मद अबु सल्मियाले भन्नुभयो– ‘अस्पताल परिसरमा शव छरपस्ट छन् र शवगृहमा अब बिजुली छैन ।’
कमान्ड पोस्ट र हतियार भण्डारण गर्न हमासले अस्पताललाई ढालको रूपमा प्रयोग गर्दै आएको इजराइलले लगातार दाबी गर्दै आएको छ तर उक्त दाबीलाई हमासले अस्वीकार गरेको छ । सेनाले हमासको उक्त प्रयोगले अस्पतालको अन्तर्राष्ट्रिय कानुनअन्तर्गत संरक्षित स्थितिलाई जोखिममा पारेको बताएको छ ।
प्यालेस्टाइनी लडाकु समूहले अमेरिकी राष्ट्रपति जो बाइडेनलाई अलशिफा अस्पतालमा इजराइली आक्रमणका लागि पूर्ण रूपमा जिम्मेवार भएको आरोप लगाएको छ । गाजामा कुनै अधिकार नभएको तर ऐतिहासिक रूपमा प्यालेस्टाइनीको प्रतिनिधि निकाय प्यालेस्टिनी प्राधिकरणले अस्पतालभित्र गरिएको नरसंहार विरुद्ध चेतावनी दिएको छ । (रासस/एएफपी
