काठमाडौँ । तिहारको अवसरमा जुवातास खेलिरहेका ९० जना पक्राउ परेको नेपाल प्रहरी प्रधान कार्यालयले जनाएको छ ।
काठमाडौँबाट १७, कञ्चनपुरबाट ४२, सिन्धुलीबाट चार, डडेलधुराबाट १३, दार्चुलाबाट सात जना र सङ्खुवासभाबाट सात जना गरी ९० जना पक्राउ परेको जनाइएको हो ।
काठमाडौँको शङ्खरापुर नगरपालिका–१ नाङ्लेभारेबाट आठ जनालाई गएराति प्रहरीले पक्राउ गरेको हो । उनीहरूबाट प्रहरीले रु ७६ हजार आठ सय ३५ जफत् गरेको छ ।
नाङ्लेभारेकै शिव मन्दिरमा जुवातास खेलिरहेको अवस्थामा नौ जनालाई पनि गए राति प्रहरीले पक्राउ गरेको छ । उनीहरूबाट प्रहरीले रु ४० हजार आठ सय ५५ पनि जफत् गरेको छ ।
यता, कञ्चनपुर, भीमदत्त नगरपालिका–१७ बाँसखेडाबाट दुई लाख ५८ हजार छ सय ९४ रुपियासहित २८ जनालाई कात्तिक २८ गते बिहान प्रहरीले पक्राउ गरेको छ ।
सोही नगरपालिका–१६ मझगाउँस्थित एक रेस्टुरेन्टमा जुवातास खेलिरहेको अवस्थामा छ जनालाई पनि आज बिहान प्रहरीले पक्राउ गरेको छ । उनीहरूबाट प्रहरीले नगद रु २५ हजार चार सय ६० जफत् गरेको छ ।
कञ्चनपुर, बेलौरी नगरपालिका–६ दुम्लीबाट आठ जनालाई २२ हजार ४० रुपियाँसहित मङ्गलबार बिहान प्रहरीले पक्राउ गरेको छ ।
त्यसैगरी, सिन्धुली, सुनकोशी गाउँपालिका–६ खाल्टेबाट जुवातास खेलिरहेको अवस्थामा चार जनालाई सोमबार राति प्रहरीले पक्राउ गरेको छ । उनीहरूबाट प्रहरीले २२ हजार सात सय ६० रुपिया जफत् गरेको छ ।
डडेल्धुरा, अमरगढी नगरपालिका–१ मौरडाबाट जुवातास खेलिरहेको अवस्थामा १३ जनालाई गए राति प्रहरीले पक्राउ गर्दा २१ हजार तीन सय ७९ रुपियाँ पनि जफत् गरेको छ ।
दार्चुला, महाकाली नगरपालिका–५ गल्फैबाट प्रहरीले जुवातास खेलिरहेको अवस्थामा सात जनालाई मङ्गलबार बिहान प्रहरीले पक्राउ गरेको छ । उनीहरूबाट प्रहरीले ४३ हजार तीन सय रुपिया पनि जफत् गरेको छ ।
सङ्खुवासभा, चैनपुर नगरपालिका–३ तीनखोप्रेबाट प्रहरीले सात जनालाई मङ्गलबार दिउँसो पक्राउ गर्दा नगद रु ३८ हजार तीन सय २५ पनि जफत् गरेको छ ।
यी सबै घटनाका सम्बन्धमा प्रहरीले आवश्यक अनुसन्धानसमेत गरिरहेको जनाइएको छ ।
