भरतपुर । जाजरकोट भूकम्पका मृतकप्रति श्रद्धाञ्जली अर्पण गर्दै रक्तिम सांस्कृतिक अभियान बागमती प्रदेश समितिद्वारा आयोजित पाँचदिने सांस्कृतिक प्रशिक्षण समापन भएको छ ।
सडक सांस्कृतिक कार्यक्रमसहित २०८० कात्तिक १८ गते शनिबार भरतपुरको चौबिसकोठीमा सो कार्यक्रमको समापन भएको हो ।
रक्तिमका महासचिव हेमराज आश्रमको सञ्चालनमा अघि बढेको उक्त कार्यक्रममा जाजरकोट भूकम्पका मृतकप्रति श्रद्धाञ्जलीस्वरूप एक मिनट मौनधारण गरिएको थियो ।
कार्यक्रममा रक्तिमका अध्यक्ष गिरिप्रसाद बुढा, राष्ट्रिय जनमोर्चाका केन्द्रीय सदस्य डम्बर पुरी र अखिल नेपाल ट्रेड युनियन महासङ्घ (अन्टुक) का महासचिव शालिकराम सापकोटाले मन्तव्य राख्नुभएको थियो ।
सो अवसरमा “बढ्दै जाऊ”, “एउटै यात्रा”, “झुक्दैन शिर हाम्रो”, “सयपत्री फुल्दा” लगायतका गीतमा नृत्य प्रस्तुत गरिएको थियो ।
बिदाइ कायक्रम
यसअघि कार्यक्रमस्थलमा पाँचदिने प्रशिक्षणको बिदाइ कार्यक्रम सम्पन्न भएको थियो ।
रक्तिम बागमती प्रदेश समितिकी अध्यक्ष देवी शर्माको अध्यक्षता तथा कृष्ण केसीको सञ्चालनमा अगाडि बढेको सो कार्यक्रममा रक्तिमका अध्यक्ष गिरिप्रसाद बुढा, महासचिव हेमराज आश्रम, राजमो चितवनका अध्यक्ष अमरबहादुर क्षेत्री र अन्टुक जिल्ला समितिका उपाध्यक्ष जितबहादुर थापाले मन्तव्य राख्नुभएको थियो ।
त्यस्तै, कार्यक्रममा नृत्य प्रशिक्षकको तर्फबाट विजय घर्ती तथा प्रशिक्षार्थीको तर्फबाट दिपसन तिमिल्सिना, मेस व्यवस्थापनको तर्फबाट टीकाराम सुवेदी र कार्यक्रमस्थल उपलब्ध गराउनुहुने मनोज केसीले पनि मन्तव्य राख्नुभएको थियो ।
प्रशिक्षण कुन विषयमा ?
गत कात्तिक १४ गतेदेखि १८ गतेसम्म सञ्चालन भएको प्रशिक्षण कार्यक्रममा रक्तिमकी केन्द्रीय सदस्य मेष्मा पुन र रक्तिम लुम्बिनी प्रदेश समितिका सदस्य विजय घर्तीले नृत्य विधामा प्रशिक्षण दिनुभएको थियो ।
त्यसैगरी, रक्तिमका अध्यक्ष गिरीप्रसाद बुढाले प्रगतिशील कला साहित्य, सङ्गठनात्मक सिद्धान्त, वर्ग र राजनीति, गीत कसरी लेख्नेलगायतका विषयमा प्रशिक्षण दिनुभएको थियो ।
त्यस्तै, महासचिव हेमराज आश्रमले प्रगतिशील गीत तथा सङ्गीतसम्बन्धी प्रशिक्षण दिनुभएको थियो ।
