नेपालगञ्ज । राष्ट्रिय जनमोर्चा बाँकेको चौथो जिल्ला सम्मेलन सुरु भएको छ ।
केन्द्रीय उपाध्यक्ष जनकराज शर्माको प्रमुख आतिथ्यमा २०८० कात्तिक १८ गते कोहलपुरमा सम्मेलनको सुरुआत भएको हो ।
सम्मेलनको उद्घाटन प्रमुख अतिथि शर्माले गर्नुभएको थियो ।
सो अवसरमा मन्तव्य राख्दै उहाँले देशमा देशमा प्रतिगामी खतरा बढदै गएको ठहर गर्नुभयो ।
त्यस्तै उहाँले देशको राष्ट्रियतासमेत कमजोर हुँदै गएको बताउनुभयो ।
‘सत्ताधारीहरू विदेशी प्रतिक्रियावादीको दलाली, चाकरी गर्दै छ । देशमा भ्रस्टाचार, कुशासन, महङ्गीले आकाश छोएको छ । देश राज्यविहीन जस्तो छ । गुण्डाराज कायम कायम भएको छ’ उहाँले भन्नुभयो– ‘यसको विरुद्ध हामो पार्टी राष्ट्रिय जनमोर्चा निरन्तर आवाज उठाउँदै आइरहेको छ ।’
उहाँले सङ्घीयता र जातिवादी गतिविधिले पनि मुलुकमा सङ्कट पैदा हुँदै गएको बताउँदै साम्राज्यवादले यसमा ठुलो लगानी गरेको दाबी समेत गर्नुभयो ।
सम्मेलनको अवसरमा राष्ट्रिय जनमोर्चाका पुराना नेताहरू लीलामाया लामिछाने, ऋषिराम लामिछाने र धनबहादुर बस्नेतलाई प्रमुख अतिथि शर्माले अबिर र खादा लगाइदिएर सम्मान गरिएको थियो ।
सम्मेलनलाई अखिल युवक सङ्घका अध्यक्ष कृष्णराज पाण्डे, अखिल नेपाल किसान महासङ्घ (अप्फा) का महासचिव तुल्सिराम सापकोटा, राजमो केन्द्रीय सल्लाहकार मोमिना खातुन, अखिल महिला सङ्घकी केन्द्रीय सदस्य पूर्णकला भण्डारी, अप्फा बाँकेका संयोजक तिलकराज पौडेल र युवक सङ्घका जिल्ला अध्यक्ष भरत खड्काले शुभकामना दिनुभएको थियो ।
सम्मेलनको उद्घाटन शत्रको अध्यक्षता जिल्ला अध्यक्ष भीमप्रसाद देवकोटाले, सञ्चालन जिल्ला सहसचिव मनबहादुर सुनारले र स्वागत जिल्ला उपाध्यक्ष जगदीश ढकालले गर्नुभएको थियो ।
उद्घाटन शत्रको समापनलगत्तै सम्मेलनको बन्दशत्र सुरु हुने आयोजक समितिले युगदर्शनलाई जानकारी गराएको छ ।
