सोल । उत्तर कोरियाले दूतावास बन्द गर्ने हालैको शृङ्खला आफ्नो बाह्य सम्बन्ध सुधार गर्नका लागि नियमित मामिला भएको बताएको छ ।
दक्षिण कोरियाले आर्थिक सङ्कटका कारण दूतावास बन्द गरेको दाबी गरेपछि उत्तर कोरियाको उक्त भनाइ आएको हो ।
सरकारी सञ्चारमाध्यम र स्थानीय अधिकारीका अनुसार गत साता प्योङयाङले अफ्रिकी सहयोगी अङ्गोला र युगान्डामा आफ्नो दूतावास बन्द गरेको छ । त्यस्तै, हङकङ र स्पेनमा पनि कूटनीतिक नियोग बन्द गरेको छ ।
यसै साता आफ्ना दूतावास बन्द गर्ने उत्तर कोरियाको कदमले उसको गम्भीर आर्थिक अवस्थालाई चित्रण गरेको छ भन्दै सोलले उत्तर कोरियालाई आफ्ना परम्परागत सहयोगीसँग न्यूनतम कूटनीतिक सम्बन्ध कायम राख्न पनि गार्हो भएको बताएको छ ।
शुक्रबार प्योङयाङको विदेश मन्त्रालयको वेबसाइटमा पोस्ट गरिएको टिप्पणीमा मन्त्रालयका एक अनाम प्रवक्ताले ‘बाह्य सम्बन्धमा आफ्नो राष्ट्रिय हितलाई प्रवद्र्धन गर्नका लागि दूतावास बन्द गर्नु नियमित मामिलाको हिस्सा’ भएको बताएका छन् ।
‘अन्तर्राष्ट्रिय परिवेश र राज्यको विदेश नीतिमा आएको परिवर्तनलाई ध्यानमा राख्दै हामी अन्य देशमा कूटनीतिक नियोग बन्द गर्न गइरहेका छौँ वा नयाँ खोल्न गइरहेका छौँ’ कुन कुन दूतावास बन्द गर्ने वा खोल्ने भन्नेबारे स्पष्ट नभएको भन्दै ती अधिकारीले भने– ‘हामीले पहिला पनि धेरै अवसरमा यस्तो कदम चालेका छौँ ।’
दक्षिण कोरियाको एकीकरण मन्त्रालयका अनुसार उत्तर कोरियाको एक सय ५० भन्दा बढी मुुलुकसँग कूटनीतिक सम्बन्ध छ तर सन् १९९० को दसकदेखि विदेशमा उसको नियोगको सङ्ख्या घटिरहेको छ । (रासस/एएफपी)
