पोखरा । लोकवार्ता परिषद् नेपालले पर्वत, बागलुङ र म्याग्दीमा बाह्रौँ लोकवार्ता सङ्गोष्ठी आयोजना गर्ने भएको छ ।
नेपाली जनजीवनमा प्रचलित संस्कृति, लोककला, साहित्य, संस्कार, रीतिथिती तथा परम्परागत ज्ञानको अध्ययन र संरक्षण गर्ने उद्देश्यले गोष्ठी आयोजना गर्न लागिएको हो ।
परिषदद्वारा आयोजित उक्त सङ्गोष्ठी यही कात्तिक १८–१९ पर्वत, २१ बागलुङ र २२–२३ गते म्याग्दीमा सञ्चालन हुने सङ्गोष्ठी तयारी समिति बागलुङका संयोजक प्राडा दिनबहादुर थापाले जानकारी दिनुभयो ।
उहाँका अनुसार सङ्गोष्ठीमा विषयविज्ञद्वारा कार्यपत्र प्रस्तुति गर्नुका साथै त्यसमाथि बहस र समीक्षा हुने छ ।
‘तीनै जिल्लाका कार्यक्रममा पहिलो दिन २० कार्यपत्र प्रस्तुत हुने छन् । केही जिल्लाबाट र अधिकांश बाहिरबाट आउने विज्ञले कार्यपत्र पेस गर्नुहुने छ’ थापाले भन्नुभयो– ‘दोस्रो दिन जिल्लाका ऐतिहासिक, धार्मिक तथा पर्यटकीय क्षेत्रको स्थलगत अध्ययन भ्रमण तय गरिएको छ ।’
सो कार्यक्रमले धवलागिरि क्षेत्रको सभ्यता र संस्कृतिको अध्ययन/अनुसन्धानमा विद्वान तथा खोजकर्तालाई प्रेरित गर्ने विश्वास आयोजकले लिएको छ । विभिन्न जातजातिको संस्कृति, जीवनशैली, धार्मिकस्थल, प्राकृतिक सम्पदा, कला, साहित्य आदिको उत्थान र संरक्षणमा महत्त्वपूर्ण टेवा पुग्ने थापाको भनाइ थियो ।
परिषद्ले सम्बन्धित विषयका विज्ञलाई लोकवार्ताका विविध विषयमा अध्ययन गर्न लगाएर उक्त अध्ययनबाट आउने निचोडलाई पुस्तकका रूपमा प्रकाशन गर्दै आएको छ । परिषद्ले बर्सेनि विभिन्न जिल्लामा पुगेर लोकवार्ता सङ्गोष्ठी गर्ने गरेको छ ।
पर्वत, बागलुङ र म्याग्दीमा हुने सङ्गोष्ठीमा बाहिरबाट आउने ५० अतिथिसहित झन्डै एक सयको सहभागिता हुने संयोजक प्राडा थापाले जानकारी दिनुभयो । स्थानीय तहलगायत विभिन्न सङ्घसंस्थासँगको सहकार्यमा सो कार्यक्रम गर्न लागिएको उहाँले बताउनुभयो ।
‘खोज, अनुसन्धान र प्राज्ञिक विषयसँग सम्बन्धित कार्यक्रम भएको हुँदा लोकवार्ता सङ्गोष्ठीले छुट्टै महत्त्व र गरिमा बोकेको छ’ थापाले भन्नुभयो– ‘परम्परागत ज्ञानको खोजी र संरक्षणले नै हाम्रो पहिचान स्थापित हुन्छ भन्नेमा परिषद् दृढ छ । यो अभियानमा सबैको सहयोगको अपेक्षा गरेका छौँ ।’
