कावासोती । राष्ट्रिय जनमोर्चा नवलपुर जिल्ला समितिले प्रमुख जिल्ला अधिकारी कल्पना श्रेष्ठलाई ज्ञापनपत्र बुझाएको छ ।
राजमो केन्द्रीय सदस्यद्वय दीपक पाण्डे र राजेन्द्र ढुङ्गाना, राजमो जिल्ला अध्यक्ष गिरबहादुर महतारा र अखिल नेपाल ट्रेड युनियन महासङ्घ (अन्टुक) का महासचिव शालिकराम सापकोटासहितको प्रतिनिधिमण्डलले २०८० कात्तिक १ गते ज्ञापन बुझाएको हो ।
ज्ञापनपत्रमा सङ्घीयता, एमसिसी र नागरिकता विधेयकको विरुद्धमा राजमो रहेको जानकारी दिइएको छ ।
त्यस्तै, ज्ञापनमा महङ्गी र कालोबजारी रोक्न बजार अनुगमन तीव्र बनाइनुपर्ने, पूर्वपश्चिम राजमार्गको तत्कालै मर्मत गर्नुपर्ने, चाडपर्वको नाममा जुवातास, होहल्ला, लडाइँझगडा, लागुपदार्थ सेवन नियन्त्रण गर्दै शान्तिसुरक्षा कायम गर्नुपर्ने माग गरिएको छ ।
त्यसैगरी, दुम्किबासदेखि त्रिवेणीसम्मको सडक निर्माण सुचारु गर्नुपर्ने, सुस्ता क्षेत्रको सीमा अतिक्रमण रोक्नुपर्ने, भृकुटी कागज कारखाना सञ्चालन गर्नुपर्ने पनि माग गरिएको छ ।
राजमो नवलपुरले ज्ञापनपत्रमा भारतीय प्रधानमन्त्रीको बिनाजानकारी कालापानी भ्रमणको विरोध तथा हालै सुदूरपश्चिममा आएको भूकमबबाट पीडितलाई उचित राहतको माग पनि गरिएको छ ।
