काठमाडौँ । कोशी प्रदेशका नवनियुक्त मुख्यमन्त्री केदार कार्कीले पद तथा गोपनीयताको शपथ लिएका छन् ।

मुख्यमन्त्री कार्कीले २०८० असोज २८ गते आइतबार तीन सदस्यीय मन्त्रिपरिषद्समेत गठन गर्दै शपथ लिएका हुन् ।

असोज २७ गते शनिबार मुख्यमन्त्री नियुक्त भएका कार्कीले सुरुमा प्रदेश प्रमुख पर्शुराम खापुङसमक्ष शपथ लिए । लगत्तै उनले नवनियुक्त दुई मन्त्रीलाई पनि शपथ गराएका छन् ।

शनिबार मुख्यमन्त्री भएका कार्कीले आइतबार नेपाली काङ्ग्रेसबाट एक र नेकपा एमालेबाट एक जना मन्त्री नियुक्त गरेका हुन् ।

एमालेबाट राम राना र काङ्ग्रेसबाट शमशेर राईलाई कार्कीले मन्त्रीको शपथ गराएका हुन् । राई र रानाको मन्त्रालय भने तोकिएको छैन ।