श्यामलाल पोखरेल, बुटवल ।
बुटवलमा केन्द्रीय कार्यालय रहेको शाइन रेसुङ्गा डेभलपमेन्ट बैङ्कले चुक्ता पुँजीमा ५० गुणा वृद्वि गरेको छ । स्थापना हुँदाको अवस्थामा ६ करोड चुक्ता पुँजी रहेको बैङ्कको हालको चुक्ता पुँजी ३ अर्ब १ करोड पुगेको छ ।
बैङ्कले २०७६ चैत्र ४ गते बुटवलमा पत्रकार सम्मेलन गरी बैङ्क स्थापनाको ११ वर्षमा ५० गुणा चुक्ता पुँजी वृद्वि गर्न सफल भइएको बैङ्कका प्रमुख कार्यकारी अधिकृत प्रकाश पौडेलले जानकारी गराए । आ.व. २०७५-७६ को प्रस्तावित १५ प्रतिशत बोनस सेयर प्रदान गरेपश्चात् चुक्ता पुँजी ३ अर्ब १ करोड भएको प्रमुख कार्यकारी अधिकृत पौडेलले पत्रकार सम्मेलनमा जानकारी गराए ।
२०६५ फागुन ११ गते स्थापना गरिएको शाइन रेसुङ्गा डेभलपमेन्ट बैङ्क नेपाल राष्ट्र बैङ्कबाट राष्ट्रियस्तरको विकास बैङ्कको रूपमा स्वीकृत प्राप्त गरिसकेको छ । साइन रेसुङ्गा डेभलपमेन्ट बैङ्क लिमिटेड प्रदेश ५ मा राष्ट्रियस्तरको कार्यक्षेत्र रहेको पहिलो बैङ्क रहेको प्रमुख कार्यकारी अधिकृत पौडलले बताए । पौडेलका अनुसार बैङ्कको हाल २७ अर्ब ६५ करोड निक्षेप रहेको छ भने २४ अर्ब ८५ करोड कर्जा प्रवाह छ । ४ लाख बढी सदस्य रहेको बैङ्कले हाल उत्पादनशील क्षेत्रमा कुल कर्जाको २६.२७ लगानी गरेको छ, कृषिलगायत ब्याज अनुदानमा आधारित कर्जा १५.३० प्रतिशत कर्जा प्रवाह गरेको छ ।
प्रदेश ५ को रोल्पा र रुकुमबाहेक १० जिल्ला र बागमती प्रदेशको चितवन र गण्डकी प्रदेशको बाग्लुङमा गरी ७२ वटा शाखाबाट बैङ्कले वित्तीय कारोवार सञ्चालन गरिरहेको छ । राष्ट्र बैङ्कको नीतिअनुसार अर्थतन्त्रप्रति जिम्मेवार बनी प्रदेश नं. ५ लाई नै मुख्य केन्द्र बनाएर देशव्यापी शाखा विस्तार गरी राष्ट्रकै अग्रणी बैङ्कको बन्ने लक्ष्य तथा योजना रहेको छ । सफलतापूर्वक मर्जरको माध्यमबाट देशकै सबल र सुदृढ वित्तीय संस्थाको रूपमा बैङ्कलाई अगाडि बढाइएको बैङ्कले दाबी गरेको छ ।
प्रदेश ५ मा मात्रै ६८ वटा शाखा कार्यालय रहेको बैकले पत्रकारिता क्षेत्रको सम्मान स्वरूप पत्रकार महासङ्घ रूपन्देहीमा ३ लाख राशीको पत्रकारिता अक्षयकोष स्थापना गरेको छ । उक्त अक्षयकोषबाट जम्मा भएको ब्याजबाट वार्षिक रूपमा एक जना पत्रकारलाई २५ हजार नगदसहित पुरस्कृत गरिने छ ।
सामाजिक उत्तरदायित्वअन्तर्गत विभिन्न कार्यक्रम गर्दै आएको बैङ्कले दुर्घटना न्यूनीकरण सरसफाइ तथा वातावरण संरक्षण, शैक्षिक क्षेत्र, वित्तीय जागरणका साथै स्वास्थ्यको क्षेत्रमा पनि काम गर्दै आएको छ । रूपन्देही, अर्घाखाँची र नवलपरासीबाट आफ्नो वित्तीय कारोवार सुरु गरेको साइन रेसुङा डेभलपमेन्ट बैङ्क लिमिटेडले २०७६ मङ्सिर १० गतेबाट राष्ट्रियस्तरको विकास बैङ्कको मान्याता पाएको हो ।
रेसुङ्गा विकास बैङ्क लिमिटेड गुल्मीसँग २०६९ चैत्र ४ गते प्युठानको गौमुखी विकास बैङ्क लिमिटेडसँग २०७३ जेष्ठ २९ गते, पूर्णिमा विकास बैङ्क लिमिटेडसँग २०७६ असोज २७ गते र भार्गव विकास बैङ्क लिमिटेड, नेपालगञ्जसँग २०७६ असोज २७ गते मर्जर गरेर आफ्नो वित्तीय कारोबारलाई अगाडि बढाउँदै आएको छ ।
अन्य बैङ्कले भन्दा अत्याधुनिक, सरल र सहज बैङ्किङ सेवा प्रदान गरिएको दाबी गर्दै आएको यस बैङ्कले बुटवलको कालिकानगरमा आफ्नै अत्याधुनिक भवन गरेको छ । निर्माणाधीन उक्त भवनबाट केही समयपछि वित्तीय कारोवार सुरु गरिने बैङ्कका कानुनी अधिकृत गोपाल खनालले जानकारी गराए ।
