नेपालगञ्ज । नवदुर्गाका आकर्षक मूर्ति नेपालगञ्जमै निर्माण हुन थालेपछि भारतीय सीमावर्ती बजार जानुपर्ने बाध्यता हटेको छ ।
दसैँको नवदुर्गामा नेपालगञ्जका टोल टोलमा स्थापना गरिने दुर्गा भवानीका मूर्ति पछिल्लो समय स्थानीय कालीगढले नेपालगञ्जमै निर्माण गरेर बिक्री वितरण गर्न थालेका छन् ।
नेपालगञ्ज–८ का छोटु केवटलाई अहिले मूर्ति बनाउन भ्याइनभ्याइ छ । नगरभवन सामुन्नेमा अस्थायी टहरा निर्माण गरेर उहाँले एक महिनादेखि मूर्तिको काम गर्दै आउनुभएको छ । घटस्थापनाको दिनसम्म माग आएका सबै मूर्ति तयार गरिसक्नुपर्ने भएकाले यतिबेला दिनरात काम भइरहेको उहाँले बताउनुभयो ।
‘तीसपैतीस जति मूर्ति तयारी अवस्थामा छन्, अरू त्यत्ति तयारी हुँदै छ, अहिले कामले भ्याइनभ्याइ छ’ कलाकार केवटले भन्नुभयो– ‘आजभोलि मूर्ति किन्न भारत जानुपर्दैन, नेपालगञ्जमै ठाउँ ठाउँमा बन्ने गरेका छन् ।’
उहाँका अनुसार, सामान्य काठ, सुथरी, पराल र माटोको मिश्रणले मूर्ति बनाउने गरिन्छ तर मूर्तिको सजावटका सामग्री भने भारतीय बजारबाटै आयात गरिन्छ । दसैँको समयमा केही मूर्ति बनाउन अर्डर आउँछ भने केही आफैँ बनाएर बिक्री गर्ने गरिएको छ ।
बाँकेको जानकी गाउँपालिकाबाहेक सदरमुकाम नेपालगञ्जमा पनि तीनचार ठाउँमा व्यावसायिक रूपमा माटोबाट भगवान्को मूर्ति बनाएर बिक्रीवितरण हुने गरेको छ । तराईमा दसैँको बेला घटस्थापनाका दिनदेखि टोल टोलमा माटोबाट बनेका भगवान्को मूृर्तिमा पूजा गर्ने चलन छ । (रासस)
