काठमाडौँ । जापान नेपाली एकता समाजले विश्वको जुनसुकै देशमा मृत्यु हुने नेपालीको शव निजका परिवारकहाँ नि:शुल्क पुर्याइदिन माग गरेको छ ।
इजरायलमा मृत्यु भएका दस जना नेपालीको शव नेपाल ल्याउने सन्दर्भमा २०८० असोज २३ गते मङ्गलबार प्रेसवक्तव्य जारी गर्दै समाजले यस्तो माग गरेको हो ।
समाजका अध्यक्ष शालिकराम सापकोटाको हस्ताक्षरमा जारी पे्रसवक्तव्यमा इजरायल घटनामा मारिएका नेपालीप्रति भावपूर्ण श्रद्धाञ्जली तथा शोकसन्तप्त परिवारप्रति समवेदना प्रकट गरिएको छ ।
वक्तव्यमार्फत इजरायल घटनाको भत्र्सना गर्दै समाजले नेपालीको शव नेपाल ल्याउन, घरपरिवारलाई क्षतिपूर्ति दिन र सङ्कटमा रहेका नेपालीलाई सुरक्षित उद्धारका लागि छिटोभन्दा छिटो पहल गर्न त्यहाँको नेपाली दूतावास र नेपाल सरकारसमक्ष माग पनि गरेको छ ।
यस्तो छ, प्रेसवक्तव्यको पूर्ण पाठ :
“जापान नेपाली एकता समाज इजरायलमा मारिएका नेपालीप्रति हार्दिक श्रद्धाञ्जली व्यक्त गर्दै त्यस्ता जघन्य घटनाको घोर भ्रत्र्सना गर्दछ ।
राज्य रेमिट्यान्सका लागि आफ्ना नागरिकलाई संसारका विभिन्न देशमा घुमाउरो तरिकाले बेच्न उद्यत छ । कतिपय बाध्यताले त कतिपय रहरले बिदेसिनेको सङ्ख्या पनि त्यति नै छ । कतिपय अध्ययनका सिलसिलामा बिदेसिने पनि छन् । नेपाली संसारको जुनसुकै ठाउँमा यसरी गए पनि त्यो नेपाली नागरिक नै हो र बाध्यताले मात्रै त्यहाँ पुगेका हुन् । जहाँ जसरी जस्तो अवस्थामा पुगे पनि प्रत्येकको मनमा नेपालीपन जीवित रहन्छ । उनीहरूले जसरी जहाँ गएर पनि त्यसको रेमिटेन्स खाने नेपाल सरकारले नै हो । तसर्थ यस्तो अवस्थामा सरकार र राजनीतिक पार्टीहरूले पनि बिदेसिने नेपालीका विषयमा सकारात्मक तथा समान धारणा बनाउन र समान व्यवहार गर्न पनि सुझाव प्रस्तुत गर्दछौँ तर विदेसिने नेपालीका विषयमा कतिपय पार्टीका नेताहरूले नकारात्मक धारणा पनि ओकल्ने गरेको पाइन्छ । त्यसो नगर्न पनि जापान नेपाली एकता समाज चेतावनी दिन चाहन्छ ।
हालै इजरायलमा भएको घटनामा नेपालीले ज्यान गुमाएको घटनाप्रति जापान नेपाली एकता समाज गहिरो दु:ख व्यक्त गर्दछ । त्यसरी दु:खद मृत्युवरण गर्ने हरेक नेपाली नागरिकप्रति हार्दिक श्रद्धाञ्जली अर्पण गर्दछ र शोकसन्तप्त परिवारजनमा हार्दिक समवेदना ब्यक्त गर्दछ ।
जापान नेपाली एकता समाजले संसारमा जहाँ जे जसरी यस्ता घटना घटेको भए पनि मानवीय क्षतिजन्य घटनाको घोर भत्र्सना गर्दछ । यस्ता जघन्य घटनाका योजनाकार र त्यसका मतियारको पनि घोर विरोध गर्दछ । इजरायलमा हमासको हमलामा मारिएका नेपालीको शव नेपाल ल्याउन, घरपरिवारलाई क्षतिपूर्ति दिन र सङ्कटमा रहेका नेपालीलाई सुरक्षित उद्धारका लागि छिटोभन्दा छिटो पहल गर्न त्यहाँको नेपाली दूतावास र नेपाल सरकारसमक्ष जापान नेपाल एकता समाज विशेष माग गर्दछ साथै सरकारसँग जुनसुकै देशमा मृत्युवरण गरेका नेपालीको लास पनि घरपरिवारसम्म नि:शुल्क पुर्याइदिने ब्यवस्था गर्नका लागि पनि जोडदार माग गर्दछ ।”
