नयाँदिल्ली । मूल प्रवाह अखिल भारत नेपाली एकता समाजले इजरायलमा रहेका नेपालीहरूको जीवनरक्षा गर्न आग्रह गर्नुका साथै ज्यान गुमाएका नेपाली विद्यार्थीप्रति भावपूर्ण श्रद्धाञ्जली व्यक्त गरेको छ ।
अध्यक्ष ठाकुर खनालको हस्ताक्षरमा अक्टुबर ९, २०२३ को मध्यरातमा शोकवक्तव्य जारी गर्दै मूल प्रवाहले मृतकका आफन्तप्रति गहिरो समवेदनासमेत व्यक्त गरेको हो ।
वक्तव्यमा यसअघि पनि नेपालबाहिर नेपालीले पटक पटक ज्यान गुमाउनुपरेको स्मरण गराउँदै राज्यसत्ता जनताप्रति उत्तरदायी नहुँदा यसरी विभिन्न समयमा नेपाली नागरिकले ज्यानु गुमाउनुपरेको बताइएको छ ।
यस्तो छ वक्तव्यको पूर्ण पाठ :
“इजरायलमा भएको त्रासदिपूर्ण घटनामा परी ज्यान गुमाएका सम्पूर्ण नेपाली विद्यार्थीप्रति हाम्रो सङ्गठन भावपूर्ण श्रद्धाञ्जली प्रकट गर्दै शोकसन्तप्त परिवारजनमा गहिरो समवेदना प्रकट गर्दछ, साथै सम्पूर्ण घाइतेको शीघ्र स्वास्थ्यलाभको कामना गर्दछ ।
देशमा उपर्युक्त शिक्षा र रोजगारको अभावमा प्रवासिएकामाथि पर्ने गरेका यस प्रकारका मानवीय सङ्कटबाट नेपालीले कैयौँपटक अनाहकमै ज्यान गुमाउँदै आइरहेका छन् । आजभन्दा करिब २० वर्ष पहिला इराकमा १२ जना नेपालीले अनाहकमै ज्यान गुमाएका थिए । २०६१ साल भदौमा जोर्डन हुँदै इराक पुगेका नेपाली १२ जना नागरिकलाई इराकी अतिवादी समूह सुन्नीले २०६१ भदौ १५ गते राति हत्या गरेको थियो । त्यस्तै, भारतको जम्मुकस्मिर र पूर्वोत्तरको कार्बिआङलाङमा पनि कैयौँ नेपालीले ज्यान गुमाएका थिए ।
नेपालको त्रिभुवन अन्तर्राष्ट्रिय विमानस्थलमा दैनिक विदेशी भूमिमा ज्यान गुमाउनेको शव बाकसमा बन्द भएर आएका दृष्य जोकसैले पनि देखेको वा थाहा भएको विषय हो । यो सबै हुनुका मुख्य कारण राज्य र राज्यसत्तामा रहेका शासक वर्ग जनताप्रति उत्तरदायी नहुनुले नै हो । देशमा उचित शिक्षा र रोजगारको व्यवस्थापन हुन सके कुनै नेपालीले विदेशी भूमिमा अनाहकमै ज्यान गुमाउनुपर्ने स्थितिमा न्यून हुने थियो ।
आज देशमा सत्तासिन राजनीतिक दलहरूको आड र मिलिभगतमा कैयौँ म्यानपावरले ‘लर्न एन्ड अर्न’ को नाममा नेपाली युवालाई विदेश पलायन गराइरहेका छन् । हालै कृषिसम्बन्धि अध्ययन गर्न ‘लर्न एन्ड अर्न’ कार्यक्रमअन्तर्गत तीन विश्वविद्यायका २६५ विद्यार्थी इजरायल गएका थिए, जसमा सुदूरपश्चिम विश्वविद्यालयका ४९ जना थिए, जसमध्यका १७ जना विद्यार्थी बसेको बङ्करमाथि हमास समूहका विद्रोहीले आक्रमण गर्दा १० जना विद्यार्थीले ज्यान गुमाएको समाचार छ । कैयौँ विद्यार्थी बङ्करमै फसेको हुन सक्ने समाचार पनि आइरहेका छन् । त्यस्तै, रोजगारका लागि गएका नेपालीको जीवन पनि जोखिममा रहेको समाचार आइरहेका छन् ।
मानवीय सङ्कटको यस घडीमा नेपाल सरकारले जुनसुकै उपाए अपनाएर भए पनि आफ्नो देशका नागरिकको स्थिति पत्ता लगाई उनीहरूको जीवनरक्षा गर्न र उद्धार गर्नका लागि गम्भीरतापूर्वक पहलकदमीका लागि अपिल गर्दछौँ ।”
