बागलुङबजार । अखिल नेपाल शिक्षक सङ्घ बागलुङको परिषद् बैठक सम्पन्न भएको छ ।
केन्द्रीय अध्यक्ष सानोभाइ कार्कीको प्रमुख आतिथ्यमा २०८० असोज २० गते शनिबार बरेङमा सो कार्यक्रम सम्पन्न भएको हो ।
परिषद्लाई सम्बोधन गर्दै प्रमुख अतिथि कार्कीले नेपाल सरकारले केही समय अगाडि मात्र संसद्मा दर्ता गराएको शिक्षा र शिक्षक विरोधी विधेयकको विरोधमा केन्द्रदेखि स्थानीय स्तरसम्मको आन्दोलनमा अखिल नेपाल शिक्षक सङ्घको सहभागिता निकै महत्त्वपूर्ण रहेको बताउनुभयो ।
उहाँले आन्दोलनपछि गरिएका सम्झौताहरू सबै शिक्षा ऐनमा समावेश गराउनका लागि शिक्षक सङ्घ र शिक्षक महासङ्घ प्रतिबद्ध भएर लाग्नुपर्ने पनि बताउनुभयो ।
देशमा भएका १८ प्रकारका शिक्षक–कर्मचारीका समस्यालाई समाधान गर्न शिक्षक महासङ्घ र पेसागत सङ्गठनसँग भएका माग र सम्झौतालाई अब बन्ने शिक्षा ऐन र नियमावलीमा सम्बोधन हुनुपर्ने भन्दै उहाँले शिक्षा क्षेत्रमा देखिएका विकृतिको अन्त्य हुनुपर्ने अन्यथा शिक्षकको इमान्दारितालाई शक्तिमा बदल्नुपर्नेमा जोड दिनुभयो ।
परिषद्मा बागलुङ जिल्ला समन्वय समितिका प्रमुख अमर थापाले शिक्षकको सबैभन्दा कान्छो संस्था भएर पनि सकारात्मक दृष्टिले सङ्गठनलाई अगाडि बढाएको भन्दै सङ्गठनमा आबद्ध शिक्षकले अहिले भर्खर मात्र भएको आन्दोलनमा शिक्षक सङ्घले सही नेतृत्व गरेको बताउनुभयो ।
कार्यक्रममा सर्वोदय क्याम्पस प्रमुख फूलकुमारी शर्मा, बरेङ गाउँपालिका अध्यक्ष तथा राजमो बागलुङका सचिवालय सदस्य कृष्णप्रसाद शर्मा, गण्डकी प्रदेशका पूर्व सांसद कृष्ण थापा, शिक्षक सङ्घ राष्ट्रिय उपाध्यक्ष कृष्णप्रसाद आचार्यलगायतले शुभकामना दिनुभएको थियो ।
परिषद्मा दसओटै पालिकाको साङ्गठनिक अवस्थाकोबारे जानकारी गराइएको थियो । त्यस क्रममा बरेङ गाउँपालिकाबाट रूपनारायण शर्मा, जैमिनी नगरपालिकाबाट चन्द्रकान्त आचार्य, बडिगाड गाउँपालिकाबाट शिवलाल बम, निसिखोला गाउँपालिकाबाट मोहन सापकोटा, ताराखोला गाउँपालिकाबाट मित्रदत्त ढकाल, तमानखोला गाउँपालिकाबाट वेदबहादुर बुढा, गल्कोट नगरपालिकाबाट सोमराज सापकोटा, ढोरपाटन नगरपालिकाबाट पदमबहादुर छन्त्याल र काठेखोला गाउँपालिकाबाट धनप्रसाद पुनले रिपोर्टिङ गर्नुभएको थियो ।
शिक्षक सङ्घ बागलुङका अध्यक्ष मित्रदत्त ढकालको अध्यक्षता तथा शिक्षक चित्र थापाको स्वागतमा अघि बढेको परिषद्को सञ्चालन जिल्ला सचिव चन्द्रकान्त आचार्यले गर्नुभएको थियो ।
परिषद्मा दसओटै पालिकाका करिब दुई सय जना शिक्षकको सहभागिता रहेको थियो ।
