काठमाडौँ । जापानमा मृत्यु भएका मिङ्कल सुनारको दाहसंस्कारका लागि साइप्रस नेपाली एकता समाजले दुई लाख नेपाली रुपियाँ सहयोग गरेको छ ।
मृतक सुनारको शव जापानबाट नेपाल लैजानुभन्दा उनका आफन्त नेपालबाट जापान आएर दाहसंस्कार गर्न खर्च कम लाग्ने भएपछि साइप्रस समाजले सो सहयोग गरेको हो ।
समाजले रकमको व्यवस्था गरेपछि रोल्पा जापान समाज जापानको पहलमा सेप्टेम्बर २४, २०२३ जापानमा नै मृतक सुनारको दाहसंस्कार गरिसकिएको छ ।
समाजका महासचिव गिरा नेपालीले सेप्टेम्बर २७ बुधबारका दिन जारी प्रेसवक्तव्यका अनुसार साइप्रस नेपाली एकता समाज केन्द्रीय सदस्य तथा प्रवासी नेपाली अक्षयकोषकी सदस्य शुशीला सुनारका बुबा बालकुमार विककी २१ वर्षीय छोरी मिङ्कल सुनारको गत अगस्त २७ गते निधन भएको थियो । मृतक सुनार रोल्पा जिल्ला थवाङ गाउँपालिका वडा नम्बर १ ठुलोगाउँ घर भई जापान टोकियोस्थित जापानिज भाषा स्कुलमा अध्यनरत हुनुहुन्थ्यो ।
मृतक सुनारको पार्थिव शरीर नेपाल झिकाउन धेरै पैसाको आवश्यकता पर्ने हँुदा त्यसो गर्नुभन्दा परिवारका सदस्य जापान गएरै दाहसंस्कार गर्दा खर्च अलि कम लाग्ने भन्ने आमा शुशीला सुनारले एकता समाजलाई जानकारी दिनुभएको थियो । साथै उहाँहरूले सो खर्च परिवारलाई जुटाउन गार्हो भएको हुँदा साइप्रस नेपाली एकतालाई सहयोगका लागि अनुरोध गर्नुभएको थियो ।
परिवारको उक्त अनुरोधबारे निर्णय गर्न समाजका अध्यक्ष खिमान थापाको अध्यक्षतामा बसेको केन्द्रीय समिति बैठकले निजलाई आन्तरिक अभियान चलाई आर्थिक सङ्कलन गरी सहयोग गर्ने निर्णय गरेको थियो । सोअनुसार प्रान्तीय आधारमा लिमासोलमा बिन्दु खड्का र गिरा नेपाली, निकोसियामा छेवाङ लामा र नैना गुरुङ, पारालिमिनी आया नापामा बासुदेव वलीलाई जिम्मा दिएको थियो ।
सो प्रान्तीय इन्चार्जको नेतृत्वले एकता समाजसहित ७६ जना व्यक्तिबाट दुई लाख नेपाली रुपैया सङ्कलन गरेको थियो । उक्त रकम मृतकका कान्छाबुबा गोविन्द विकको नाममा सेप्टेम्बर २५ का दिन सिद्धार्थ बैङ्क लिमिटेडमा पठाइएको महासचिव नेपालीले जानकारी दिनुभयो ।
समाजद्वारा धन्यवाद
यसैबिच, साइप्रस नेपाली एकता समाजले मृतक सुनारको दाहसंस्कार गर्न आर्थिक सहयोग गर्ने सम्पूर्ण सहयोगी तथा प्रवासी नेपाली अक्षयकोषप्रति धन्यवाद व्यक्त गरेको छ ।
महासचिव नेपालीले प्र्रेसवक्तव्यमा भन्नुभएको छ : “शुशीला सुनारको दु:खद निधन भएको परिस्थितिमा एकता समाजले चलाएको अभियानमा आफ्नो मानवीय कर्तव्य निर्वाह गरी आर्थिक सहयोग गर्नु हुने सम्पूर्ण सहयोगदाताप्रति साइप्रस नेपाली एकता समाज केन्द्रीय समिति तथा प्रवासी नेपाली अक्षयकोष हार्दिक धन्यवाद व्यक्त गर्दछ ।”
