रामप्रसाद पौडेल, हैदरावाद (भारत) ।
मूल प्रवाह अखिल भारत नेपाली एकता समाजले रोजगारीका लागि भारत पुगेका एक युवकका परिवारलाई भारु एक लाख पचास हजार क्षतिपूर्ति दिलाएको छ ।
सर्लाही जिल्ला ईश्वरपुर–१२ घर भई हैदराबाद पुगेका ३५ वर्षीय रामबहादुर मिर्चिङमगरको हृदयघातका कारण सेप्टेम्बर २२, २०२३ का दिन निधन भएपछि मूल प्रवाहले क्षतिपूर्ति दिलाएको हो ।
उनी हैदराबादको जिडिमेटलास्थित रेडियन्ट एलस्टोमर कम्पनीमा गत डेढ महिनादेखि हेल्परको काम गर्दै आइरहेका थिए । अचानक सेम्टेम्बर २२ को साँझ करिब ६ बजे उनी चक्कर आएर भुइँमा लड्न पुगे । उनलाई तुरुन्तै उठाएर हस्पिटल पुयाइयो तर हस्पिटलमा डाक्टरले मृत घोषित गरिदिएका थिए ।
घटनाको जानकारी मूल प्रवाहका क्षेत्रीय सदस्य कोषाध्यक्ष घनश्याम शर्मा, क्षेत्रीय सदस्य थानबहादुर क्षेत्री मूल प्रवाहका कार्यकर्ता सूर्यबहादुर थापालाई प्राप्त भएपछि उहाँहरूले हस्पिटल गएर घटनाको बारेमा जानकारी लिनुभएको थियो । त्यस क्रममा शवको पोस्टमार्टम गरेपछि गान्धी हस्पिटलको शवगृहमा पुयाइएको थियो । नेपालबाट मृतकका भाइ आएपछि सेप्टेम्बर २४ का दिन दाहसंस्कार गरिएको हो ।
त्यसको लगत्तै मालिकसँग वार्ता गरी क्षतिपूर्तिस्वरूप भारु एक लाख पचास हजार रुपियाँ मृतकका बाबुलाई दिलाउने काम भएको थियो ।
त्यस्तै, मृतकको आजसम्मको तलब, नेपालबाट भाइ आउनेजाने जहाज टिकटको खर्च, दाहसंस्कारको खर्च गरी थप भारु पचास हजार दिलाइएको थियो ।
