हैदराबाद (भारत) । भारत तेलङ्गनाको हैदरावादमा मूल प्रवाह अखिल भारत नेपाली एकता समाजले तिजी कार्यक्रम सम्पन्न गरेको छ ।
मध्यदक्षिण क्षेत्रीय महिला विभागको आयोजनामा सेप्टेम्बर १७, २०२३ आइतबारका दिन उक्त कार्यक्रम सम्पन्न भएको हो ।
“राष्ट्रियता र गणतन्त्रको रक्षा गरौँ, सङ्घीयता र एमसिसी खारेज गरौँ” नाराका साथ सम्पन्न सो कार्यक्रमको प्रमुख अतिथि केन्द्रीय सदस्य तथा मध्यदक्षिण क्षेत्रीय अध्यक्ष रामप्रसाद पौडेल हुनुन्थ्यो ।
सो अवसरमा मन्तव्य राख्दै उहाँले तिजी कार्यक्रममा मौलिकताभन्दा पनि विभिन्न कुरीति र कुसंस्कारलाई अँगाल्दै जाने काम भइरहेकोमा त्यसप्रति विरोध व्यक्त गर्नुभयो ।
कार्यक्रमलाई सम्बोधन गर्दै केन्द्रीय सदस्य फूलबिना पौडेलले महिलाहरूले परम्परागत प्रकारबाट नभई प्रगतिशील तरिकाले तिजलाई बुझ्न सक्नुपर्नेमा जोड दिनुभयो ।
कार्यक्रममा मूल प्रवाहका केन्द्रीय प्रतिनिधि के रतनसिंह, क्षेत्रीय कोषाध्यक्ष घनश्याम शर्मा, क्षेत्रीय सदस्य राजु दुलाल, रक्तिम केन्द्रीय विभागकी माया थापा, रक्तिम क्षेत्रीय विभागकी संयोजक कृष्णाकुमारी विक, महिला उत्तर नगर विभागकी संयोजक बिजुला शर्मा, दक्षिण महिला विभागकी संयोजक गुमा राना, विद्यार्थी क्षेत्रीय विभागकी सदस्य प्रियङ्का विकको आतिथ्य रहेको थियो ।
गङ्गा कडायतको सञ्चालन तथा महिला क्षेत्रीय विभागकी संयोजक पुष्पा पौडेलको अध्यक्षतामा अघि बढेको उक्त कार्यक्रममा उपस्थित जनसमुदायलाई सबिता पौडेलले स्वागत मन्तव्यद्वारा स्वागत गर्नुभएको थियो ।
कार्यक्रममा महिला अधिकार, मताधिकार, प्रवासी जीवनमा भोग्नुपरेको कथाव्यथा, सङ्घीयताको खारेजी, एमसिसीको खारेजी, गणतन्त्रको रक्षा, समाजमा महिलामाथि हुने गरेको उत्पीडन हिंसा आदि विषयमा गीत प्रस्तुत गरिएको थियो ।
कार्यक्रममा महिला क्षेत्रीय विभाग, उत्तर नगर विभाग, दक्षिण महिला विभाग, सापुरनगर एरिया, हैदरनगर एरिया, सैनिकपुरी एरिया, सेकेन्दराबाद ए एरिया ,सेकेन्दराबाद बी एरिया, नाचाराम एरिया ,कुसाइगुडा एरिया, रक्तिम क्षेत्रीय विभाग सहित १३ ओटा टोलीले तिजी गीत र नृत्य प्रस्तुत गरेका थिए ।
सो अवसरमा रक्तिमकै तिजी गीतमा रक्तिमका कलाकारहरूले पनि नृत्य प्रस्तुत गरेका थिए ।
