काठमाडौँ । सरकारले प्रतिनिधिसभामा दर्ता गराएको विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक–२०८० शिक्षकको हकहितमा नभएको भन्दै शिक्षकहरूले विधेयकको ड्राफ्ट जलाएका छन् ।
२०८० भदौ २९ गते शुक्रबार राहत शिक्षकहरूले संसद्मा दर्ता भएको शिक्षा विधेयकले शिक्षकको अधिकार कुण्ठित गर्ने गरी आएको भन्दै विधेयक जलाएर साङ्केतिक विरोध जनाएका हुन् ।
माइतिघरमा विधेयक जलाउँदै नेपाल राहत शिक्षक केन्द्रीय समितिका अध्यक्ष खेमराज अधिकारीले सामुदायिक विद्यालयमा कार्यरत देशैभर ४० हजार राहत शिक्षकको हक अधिकार कुण्ठित गर्ने गरी सरकारले विधेयक ल्याएको बताए ।
उनले विगतमा गरेका सम्झौता विपरीत मस्यौदा ल्याइएको भन्दै आफूहरूलाई मान्य नहुने बताए । अधिकारीले भदौ २७ गते विधेयक संसद्मा दर्ता भएको भन्दै सो दिन आफूहरूका लागि कालो दिन भएको बताए ।
‘हामी सामुदायिक विद्यालयमा कार्यरत देशैभर ४० हजार राहत शिक्षक छौँ । विगत लामो समयदेखि सामुदायिक विद्यालयमा १८ वर्षदेखि कार्यरत राहत शिक्षकलाई ५२ वर्षपछि नेपाल सरकारले शिक्षा ऐनको ड्राफ्ट संसद्मा प्रस्तुत गरेको छ । विगतमा गरेका सम्झौता विपरीत ड्राफ्ट आएको छ । सरकारले २० हजार शिक्षकलाई विस्थापित गर्ने गरी विधेयक ल्याएको छ । विधेयक २७ गते आएको हो र त्यो दिन कालो दिन हो’ अधिकारीले भने– ‘त्यसैले विधेयकको विरोधमा हामीले यो ड्राफ्ट जलाउँदै छौँ । सामुदायिक विद्यालयमा कार्यरत राहत शिक्षकलाई आन्तरिक प्रतिष्पर्धाबाट स्थायी व्यवस्थापन गर्नुपर्छ भन्ने हाम्रो माग हो ।’
उनले राहत शिक्षकलाई आन्तरिक प्रतिस्पर्धाबाट स्थायी व्यवस्थापन गर्नुपर्ने आफूहरूको माग रहेको बताए ।
