वशन्त खड्का, सन्धिखर्क ।
अर्घाखाँचीमा अखिल नेपाल महिला सङ्घले तिजमिलन तथा शुभकामना आदानप्रदान कार्यक्रम सम्पन्न गरेको छ ।
सदरमुकाम सन्धिखर्क २०८० भदौ १९ गते मङ्गलबार उक्त कार्यक्रम सम्पन्न भएको हो ।
कार्यक्रममा प्रमुख अतिथि महिला सङ्घकी महासचिव सकुन्तला रानाले सम्बोधन गर्दै सबै चार्डपर्वलाई सांस्कृतिक अनुशासन र आपसी सद्भाव कायम राख्ने गरि मनाउनुपर्नेमा जोड दिनुभएको थियो ।
पर्वहरूमा हुनेले भड्किलो कार्यले गर्दा नहुनेको दु:ख थपिने भन्दै महासचिव रानाले हुनेले नहुनेलाई दिएर पर्व मनाउनुपर्ने बताउनुभयो ।
कार्यक्रममा राष्ट्रिय जनमोर्चाका नेता शेरबहादुर बिसले मन्तव्य राख्दै तिज पर्व महिलासित सम्बन्धित चाड भएको भन्दै भड्किलो, विकृति र विसङ्गतिबाट जोगाउन सुझाव दिनुभयो ।
चाडपर्वको नाममा भइरहेको विकृतिलाई चिर्दै नेपाली कला र संस्कृतिलाई पर्यटनसँग जोडेर व्यावसायिक बनाउनुपर्नेमा पनि नेता बिसीको जोड थियो ।
कार्यक्रममा राजमो केन्द्रीय सदस्य सागर केसी, राजमो जिल्ला अध्यक्ष थम्मन केसी, जिल्ला कोषाध्यक्ष गोविन्द बिसीलगायतको उपस्थिति रहेको थियो ।
कार्यक्रम महिला नेतृ मीना भट्टराईको अध्यक्षता, लीला भुसालको स्वागत मन्तव्य र कल्पना पोख्रेलको सञ्चालनमा सम्पन्न भएको थियो ।
सो अवसरमा महिला सङ्घमा आबद्ध महिला नेतृ तथा कार्यकर्ताहरूले प्रगतिशील तथा भावनात्मक गीत गाएर रमाइलो गरेका थिए ।
