जनकराज पौडेल, चेन्नै ।
मूल प्रवाह अखिल भारत नेपाली एकता समाज, दक्षिण भारत क्षेत्रीय समितिको आयोजनामा एम.सी.सी. (मिलेनियम च्यालेन्ज कर्पोरेसन) विरुद्ध कार्यक्रम सम्पन्न भएको छ ।
अध्यक्ष ठाकुर खनालको प्रमुख आतिथ्यमा २०८० भदौ १३ गते बुधबार साँझ भर्चुभल माध्यमद्वारा सो कार्यक्रम सम्पन्न भएको हो ।
कार्यक्रमलाई सम्बोधन गर्दै प्रमुख अथिति खनालले एम.सी.सी. विशुद्ध अनुदान मात्र नभएर अमेरिकी साम्राज्यवादको हिन्दप्रसान्त रणनीतिको अङ्ग भएको हुनाले त्यसबाट नेपाली सार्वभौमिकतासामु आँच पुग्ने बताउनुभयो ।
‘एमसिसीको आवरणमा अमेरिकी साम्राज्यवादले नेपालको सार्वभौमिकतामाथि नाङ्गो हस्तक्षेप गरेको छ’ उहाँले भन्नुभयो– ‘नेपालको राष्ट्रिय स्वाधीनता खतरामामाथि आँच पुग्ने भएकाले एम.सी.सी. लाई कुनै पनि हालतमा खारेज गर्नुपर्दछ ।’
कार्यक्रमलाई सम्बोधन गर्दै महासचिव प्रेम पौडेलले देशमा एकातिर प्रतिगामि तत्त्वहरू सलबलाइरहँदा आन्दोलनका उपलब्धि गुम्ने खतरा र अर्कोतर्फ साम्राज्यवादको नाङ्गो हस्तक्षेपका कारण राष्ट्रियतामाथि आँच पुग्ने बताउनुभयो ।
उहाँले यी दुवै खतराका विरुछ सम्पूर्ण देशभक्त तथा वामपन्थीहरू एकजुट हुनुपर्ने बताउनुभयो ।
कार्यक्रममा उपाअध्यक्ष केबी थापा, कोषाध्यक्ष मदन शर्मा, केन्द्रीय सदस्यहरू भीमबहादुर थापा, भगवति कुँवर, चोवनाथ शर्मा, चन्द्रकान्त शर्मा, नरेश विक, केशमान नेपाली, राष्ट्रिय जनमोर्चा गुल्मी नेता तथा वडासदस्य अशोक पुन, मध्यदक्षिण भारत क्षेत्रीय समितिका सचिव तिलक रानाको आतिथ्य रहेको थियो ।
सहिदको सम्मानमा एक मिनेट मौनधारणपश्चात् अघि बढेको उक्त कार्यक्रममा दक्षिण भारत क्षेत्रीय सहसचिव धर्मराज शर्माले स्वागत गर्नुभएको थियो ।
