काठमाडौँ । राष्ट्रिय जनमोर्चाले धादिङ दुर्घटनाप्रति श्रद्धाञ्जली व्यक्त गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा आज २०८० भदौ ६ गते बुधबार नै प्रेसवक्तव्य जारी गर्दै राजमोले श्रद्धाञ्जली व्यक्त गरेको हो ।
राजमोले प्रेसवक्तव्यमार्फत् शोकसन्तप्त परिवारप्रति समवेदना पनि प्रकट गरेको छ ।
त्यसैगरी वक्तव्यमा घाइतेहरूको शीघ्र र यथोचित उपचारका लागि नेपाल सरकारसित मागसमेत गरिएको छ ।
यस्तो छ, प्रेसवक्तव्यको पूर्ण पाठ :
“काठमाडौँबाट म्याग्दीतर्फ गइरहेको प्रदेश–३–०१–००५ ख ९९५२ नम्बरको यात्रुवाहक बस आज मिति २०८० भदौ ६ गते बुधबार बिहान ११ बजेतिर धादिङ जिल्लाको गजुरी गाउँपालिका–२ चालिसेबाट त्रिशूली नदीमा खस्दा ८ जनाको घटनास्थलमै मृत्यु भएको छ भने एक दर्जनभन्दा बढी घाइते भएका छन् ।
राष्ट्रिय जनमोर्चा उक्त घटनामा ज्यान गुमाएका मृतकप्रति भावपूर्ण श्रद्धाञ्जली तथा शोकसन्तप्त परिवारजनप्रति समवेदना व्यक्त गर्दछ । त्यस्तै, घाइतेहरूको शीघ्र तथा यथोचित उपचारका लागि नेपाल सरकारसित माग गर्दछ ।”
यो पनि
धादिङ बस दुर्घटना अपडेट : मृतक चारको सनाखत
