गोपालप्रसाद भट्टराई, सन्धिखर्क ।
अर्घाखाँचीको भूमिकास्थान–१० धनचौरमा अखिल नेपाल युवक सङ्घको भेला सम्पन्न भएको छ ।
राष्ट्रिय जनमोर्चा अर्घाखाँचीका अध्यक्ष थम्मन केसीको प्रमुख आतिथ्यमा २०८० भदौ ४ गते आइतबार गते सो भेला सम्पन्न भएको हो ।
भेलालाई सम्बोधन गर्दै उहाँले नेपालमा युवालाई भाडाको खेताला बनाइएको आरोप लगाउनुभयो ।
बेरोजगार उत्पादन गर्ने शिक्षा, विदेश पलायन बनाउने राज्यको नीति र राजनीतिमा भर्याङ बनाएर युवाशक्तिको दुरुपयोग गर्ने प्रवृत्ति रहेकाले युवाहरू सचेत हुनुपर्ने उहाँको जिकिर छ ।
जिल्ला अध्यक्ष केसीले देशको राष्ट्रियता, स्वतन्त्रता, स्वाधीनता र गणतन्त्रको रक्षाका लागि युवाहरूले राजनीति बुझ्नुपर्ने खाँचोसमेत औल्याउनुभयो ।
भेलालाई अखिल (छैठौंं) का केन्द्रीय सल्लाहकार गोपालप्रसाद भट्टराई, अखिल नेपाल युवक सङ्घका जिल्ला अध्यक्ष रेशम विक र राजमो
भूमिकास्थान नगर सदस्य तथा धनचौरका सचिव भीमलाल भुसालले पनि सम्बोधन गर्नुभएको थियो ।
भेलाले विष्णुप्रसाद भट्टराई अध्यक्ष रहनुभएको ११ सदस्यीय वडासमिति गठन गरेको छ ।
समितिको उपाध्यक्षमा तुलसा विक, सचिवमा मधु रेग्मी, सहसचिवमा बाबुराम गैरे र कोषाध्यक्षमा बिना मगर चयन हुनुभएको छ ।
त्यस्तै, समितिको सदस्यहरूमा लक्ष्मण बुढा, सन्तोष गैरे, माधव भट्टराई, विष्णु विक र कृष्ण नेपाली छनौट हुनुभएको छ ।
समितिको सदस्यमा एक सदस्य रिक्त राखिएको सो भेलाले भीमलाल भुसाल, तारापति गैरे, मीना पुन, मधु गैरे, मीना भट्टराई र गुमानसिंह पुनलाई सल्लाहकारमा छनौट गरेको छ ।
मधु गैरेको अध्यक्षता तथा मधु रेग्मीको स्वागत मन्तव्यका साथ अघि बढेको उक्त भेलाको सञ्चालन विष्णुप्रसाद भट्टराईले गर्नुभएको थियो ।
