काठमाडौँ । राष्ट्रिय जनमोर्चाले टीकापुर हत्याकाण्डका दोषी रेशम चौधरीलाई आममाफी दिने सरकारको निर्णय गलत पुष्टि भएको ठहर गरेको छ ।
टीकापुर हत्याकाण्डको सम्बन्धमा सर्वोच्च अदालतले साउन ३२ गते जारी गरेको फैसलाको पूर्ण पाठको सन्दर्भमा राजमोले यस्तो धारणा व्यक्त गरेको हो ।
२०८० भदौ १ गते शुक्रबार अध्यक्ष चित्रबहादुर केसीद्वारा जारी प्रेसवक्तव्यमा राजमोले यस्तो अवधारणा व्यक्त गरेको छ ।
स्वयम् सर्वोच्च अदालतले राजनैतिक सौदाबाजीको आधारमा फौजदारी अपराधमा संलग्न व्यक्तिलाई आममाफी दिनु गलत भएको फैसला दिएबाट राजमोको विचार सही भएको प्रेसवक्तव्यमा दाबी गरिएको छ ।
यस्तो छ, प्रेसवक्तव्यको पूर्ण पाठ :
“टीकापुर हत्याकाण्डको विषयमा सर्वोच्च अदालतले २०८० जेठ ७ गते गरेको फैसलाको पूर्ण पाठ सार्वजनिक भएको छ । टीकापुर हत्याकाण्डको सिलसिलामा जारी फैसलाले विभत्स हत्यामा संलग्न व्यक्तिलाई आममाफी दिने कुरालाई गलत बताएको छ । राजनीति गर्नेले कुनै अपराध गरेमा राजनीतिक उद्देश्यले गरेको भनेर अपराधलाई संरक्षण गर्न वा अपराधको राजनीतिकरण गर्न नहुने भनेर दिएको जोडलाई हाम्रो पार्टी राष्ट्रिय जनमोर्चाले समर्थन तथा स्वागत गर्दछ ।
टीकापुर हत्याकाण्डका नाइके रेशम चौधरीलाई आममाफी दिने सरकारको निर्णयलाई हाम्रो पार्टी राष्ट्रिय जनमोर्चाले विरोध गरेको थियो । हाम्रो त्यो विरोध सही थियो भन्ने कुरा सर्वोच्च अदालतको फैसलाले पुष्टि गरेको छ । टीकापुर हत्याकाण्ड कुनै राजनीतिक उद्देश्यले प्रेरित गतिविधि वा कार्य नभएर सभ्य समाजले कल्पनासम्म गर्न नसक्ने नरसंहार थियो तर सरकारले सत्ता संरक्षणका लागि राजनीतिक सौदाबाजीका आधारमा नै आम माफी दिने निर्णय गरेको थियो । यो फैसलाले आगामी दिनमा सरकारले सत्ता स्वार्थबाट प्रेरित भई जघन्य फौजदारी अपराधमा संलग्नलाई आममाफी दिन सक्ने कुरालाई नियन्त्रण गर्न सके देशमा सुशासन कायम गर्न मद्दत पुग्ने छ ।”
यो पनि
टीकापुर घटनामा सर्वोच्चको फैसलाको पूर्णपाठमा के छ ?
