कावासोती । आगामी २०८० भदौ २ गते शनिबार हुने भनिएको राष्ट्रिय जनमोर्चा गैँडाकोटको दोस्रो नगर सम्मेलनको तीव्र तयारी भइरहेको छ ।
सम्मेलनको तयारीका लागि केही दिन मात्रै बाँकी रहँदा राजमो गैँडाकोटले सम्मेलनको तयारी तीव्र पारेको हो ।
राजमोका पूर्व केन्द्रीय सचिव कृष्ण अधिकारीका अनुसार गैँडाकोट नगर सम्मेलन नजिकिँदै जाँदा सम्मेलनको प्रचार प्रसार तीव्र भएको छ ।
त्यस क्रममा साउन ३२ गते बिहीबारसम्म वडा नम्बर १, २, ५, १३, १४ र १५ मा जनभेटघाट कार्यक्रम सम्पन्न भइसकेका छन् ।
उहाँले भन्नुभयो भयो– ‘राष्ट्रिय जनमोर्चाको प्रचार टोली बाँकी वडामा भोलि पुग्दै छ ।’
प्रचार प्रसार टोलीमा अधिकारीका साथै राजमो केन्द्रीय सदस्य तथा बागलुङ जिल्ला अध्यक्ष राजेन्द्र ढुङ्गाना, अखिल नेपाल ट्रेड युनियन महासङ्घ (अन्टुक) का महासचिव शालिकराम सापकोटा, राजमो नेताहरू चन्द्र सापकोटा, शशि पौडेल, मानबहादुर रानाभाट, केशवहरि पौडेल, ज्ञानु थापालगायत सहभागी हुनुहुन्छ ।
जनता राजमोप्रति उत्सुक
जनभेटघाटको क्रममा जनताले राजमोप्रति उत्सुकता देखाएको नेता अधिकारीले बताउनुभयो ।
‘जनता उत्साहित छन्’ उहाँले भन्नुभयो– ‘राष्ट्रिय जनमोर्चा निष्कलङ्क पार्टी भएकाले हामी जहाँ जहाँ पुग्यौँ, त्यहाँ त्यहाँ जनताले अत्यन्तै उत्सुकता देखाएका छन् ।’
उहाँले जनभेटघाटको क्रममा राजमोका राजनीतिक जनताले गम्भीरतापूर्वक सुनेको बताउनुभयो ।
नेता अधिकारीले भन्नुभयो– ‘जनता राजमोको राजनीतिबारे जिज्ञासु छन् । त्यसैले हाम्रो प्रचार प्रसार अभियान उत्साहजनक रूपमा अगाडि बढिरहेको छ ।’
उहाँले सम्मेलनमा व्यापक जनताको उपस्थिति रहनुका साथै सम्मेलन भव्य रूपमा सफल हुने पनि बताउनुभयो ।
गैँडाकोट नगर समितिको दोस्रो सम्मेलन आगामी भदौ २ गते शनिबार बेल्डिहास्थित हलमा हुँदै छ ।
‘सम्मेलनको सम्पूर्ण तयारी पूरा भइसकेको छ’ अधिकारीले भन्नुभयो– ‘सम्मेलनमा कुल १४ ओटा वडामध्ये ११ ओटा वडाबाट प्रतिनिधित्व हुने छ ।’
उहाँले उद्घाटन शत्रमा सयौँ जनताको उपस्थिति रहने दाबीसमेत गर्नुभयो ।
उहाँका अनुसार राजमो नवलपुरको जिल्ला सम्मेलन आगामी असोज ६ गते हुँदै छ । त्यसको तयारीस्वरूप यतिखेर राजमोका नगर सम्मेलन सम्पन्न भइरहेका छन् ।
अहिलेसम्म कावासोती नगरपालिका र मध्यविन्दु नगरपालिकाको नगर सम्मेलन भइसकेको छ भने आगामी भदौ ९ गते देवचुली नगरपालिका र हुप्सेकोट गाउँपालिकाको तथा भदौ १८ गते विनयत्रिवेणी नगरपालिकाको नगर सम्मेलन हुँदै छ ।
