काठमाडौँ । अखिल नेपाल जनजाति सम्मेलनको का. अध्यक्षमा अमरध्वज राना तथा का.वा. महासचिवमा उषा पुन चयन हुनुभएको छ ।
२०८० साउन २८ र २९ गते काठमाडौँमा सम्पन्न केन्द्रीय समिति बैठकले सो निर्णय गरिएको हो ।
बैठकले अध्यक्ष निमबहादुर बुढाथोकीमगरले व्यावहारिक कारणले छ महिनाका लागि बिदा मागेकाले त्यसलाई स्वीकृत गरेर का.वा. अध्यक्षमा अमरध्वज रानामगरलाई चयन गरिएको, त्यसरी रिक्त हुन पुगेको का.वा. महासचिवमा उषा पुनलाई चयन गरिएको जानकारी गराइएको छ ।
त्यस्तै, गुमानसिंह पुनलाई कोषाध्यक्षमा चयन गरिएको प्रेसविज्ञप्तिमा जानकारी गराइएको छ ।
का.वा. महासचिव अमरध्वज रानाको हस्ताक्षरमा जारी प्रेसविज्ञप्तिमा सो जानकारी दिइएको छ । विज्ञप्तिमा देशमा प्रतिगमनका साथै साम्राज्यवादको हस्तक्षेप बढ्दै गइरहेकोमा चिन्ता व्यक्त गरिएको छ । लोकतन्त्र, गणतन्त्र र राष्ट्रियतासमेतको रक्षाका लागि व्यापक जनमत र आन्दोलन उठाउनुपर्ने आवश्यकतामा जोड दिइएको छ ।
त्यस्तै, जनजाति समस्या मूलत: वर्गीय समस्या भएको उल्लेख गर्दै वक्तव्यमा २०६२–६३ सालको आन्दोलनद्वारा प्राप्त उपलब्धिको रक्षा तथा जनजाति अधिकारको रक्षाका लागि एकजुट हुन पनि आग्रह गरिएको छ ।
प्रेसविज्ञप्तिमा जनजाति सम्मेलनका केन्द्रीय सदस्य रामबहादुर पुनको असामयिक निधन भएकोमा शोक प्रस्ताव पारित गरिएको जानकारी गराइएको छ ।
एवम् प्रकारले प्रेसविज्ञप्तिमा प्रदेश समितिको गठन/पुनर्गठन, सदस्यता वितरणमा ध्यान दिन आग्रह गरिएको छ । जनजाति सम्मेलनले आफ्नो सङ्गठनातमक अभियानले नेकपा (मसाल) को ऐतिहासिक तीन अभियानसित जोडेर अगाडि बढाउने निर्णय गरेको पनि बताइएको छ ।
यस्तो छ, प्रेसविज्ञप्तिको पूर्ण पाठ :
“अखिल नेपाल जनजाति सम्मेलन केन्द्रीय समितिको बैठक २०८० साउन २८ र २९ गते काठमाडौँमा बस्यो । बैठकले अहिलेको तात्कालिक परिस्थितिबारे छलफल गरी जानकारीका लागि यो प्रेसविज्ञप्ति जारी गरिएको छ ।
१. आज देशमा प्रतिगमनका साथै साम्राज्यवादको प्रभाव बढेर गएको छ । त्यसले गर्दा लोकतन्त्र, गणतन्त्र र राष्ट्रियतामा समेत गम्भीर खतरा पुग्ने सम्भावना बढेर गएको छ । त्यसैगरी, धर्मनिरपेक्षतासमेत माथि पनि गम्भीर आँच पुग्दै गइरहेको छ । यी विषयहरूमा व्यापक जनमत र आन्दोलन उठाउनुपर्ने आवश्यकतामा हाम्रो सङ्गठन अखिल नेपाल जनजाति सम्मेलनले जोड दिन्छ ।
२. एकातिर, भारतीय साम्राज्यवाद र अमेरिकी साम्राज्यवाद दिनप्रतिदिन नेपालमाथि हस्तक्षेपकारी भूमिका खेल्दै आइरहेका छन् । त्यसले गर्दा देशको राष्ट्रियता, सार्वभौमिकता र भौगोलिक अखण्डतामाथि खतरा बढेर गएको छ भने अर्कोतिर, एमालेलगायत राजावादी शक्तिहरूले देशलाई प्रतिगमनको बाटोतिर लैजाने खतरा बढेर गएको छ । यसले गर्दा २०६२–६३ सालको आन्दोलनबाट प्राप्त अधिकार गुम्ने खतरा बढेर गएको छ । त्यसरी लोकतन्त्र, गणतन्त्र र धर्मनिरपेक्षताको रक्षाका लागि आवाज उठाउन हामीले देशका आदिवासी जनजातिसहित सम्पूर्ण शोषित, पीडित जनतासित अपिल गर्दछौँ ।
३. आदिवासी जनजातिका समस्या केवल जातीय समस्या मात्र होइन, त्यो वर्गीय समस्या पनि हो । वर्गीय समस्या समाधान यो पुँजीवादी गणतन्त्रबाट सम्भव छैन तर पनि २०६२–६३ बाट प्राप्त अधिकार रक्षा गर्नका लागि सङ्घर्षको आवश्यकता छ । त्यसकारण प्राप्त अधिकार रक्षाका लागि देशमा रहेका सबै जनजातिलाई एकजुट बनाउनुपर्ने आवश्यकतामा हाम्रो सङ्गठन जोड दिन चाहान्छ ।
४. बैठकद्वारा अखिल नेपाल जनजाति सम्मेलनका केन्द्रीय अध्यक्ष निमबहादुर बुढाथोकीमगरले आफ्नो व्यावहारिक समस्याले गर्दा ६ महिनाका लागि बिदा माग्नुभएको हुँदा सो बिदा स्वीकृत गरी सम्मेलनका महासचिव अमरध्वज रानामगरलाई कार्यवाहक अध्यक्षमा राख्ने निर्णय भएको छ भने रिक्त महासचिव पदमा सचिव उषा पुनलाई कार्यवाहक महासचिव बनाइएको छ । त्यस्तै, रिक्त कोषाध्यक्ष पदमा गुमानसिंह पुनलाई राख्ने निर्णय गरिएको छ ।
५. अखिल नेपाल जनजाति सम्मेलनका केन्द्रीय सदस्य रामबहादुर पुनको उपचारको क्रममा चितवनस्थित भरतपुर मेडिकल कलेजमा असामयिक निधन भएको हुँदा उहाँको शोकको घडीमा बैठकद्वारा शोकप्रस्ताव पारित गरिएको छ ।
६. बैठकले सङ्गठनसम्बन्धी महत्वपूर्ण निर्णय गरेको छ, जसमा जिल्ला समिति गठन/पुनर्गठन गर्ने बैठक बसाल्ने, सदस्यता वितरण जस्ता कार्य सम्पन्न गर्ने निर्णय गरिएको छ ।
७. नेकपा (मसाल) ले सञ्चालन गरेको ऐतिहासिक तीन अभियानलाई सहयोग गर्ने निर्णय गरियो । असोजमा सञ्चालन गरिने अखिल नेपाल जनजाति सम्मेलनको सङ्गठनात्मक अभियानलाई ऐतिहासिक तीन अभियानसँग जोडेर लैजाने निर्णय गरिएको छ ।”
