हैदरावाद (भारत) । मूल प्रवाह अखिल भारत नेपाली एकता समाजले हैदरावादमा एक ज ना नेपालीलाई भारु ५० हजार रुपियाँ क्षतिपूर्ति दिलाएको छ ।
बाग्लुङ जिल्ला जैमिनी नगरपालिका वडा न ९ खोटियारुख निवासी डम्बरबहादुर नेपालीका ४६ वर्षीय माइला छोरा टेकबहादुर नेपालीलाई मूल प्रवाहले क्षतिपूर्ति दिलाएको हो ।
हैदराबादमा जिडिमेट्लास्थित एउटा निर्माण कम्पनीको सामान सप्लाई गर्ने पसलमा कार्यरत नेपाली अगस्त १२, २०२३ बिहान करिब ११:३० बजे चक्कर लागेर पल्टेका थिए । मालिकले उठाएर हस्पिटल लगेर गएको तर हस्पिटलमा ग्लुकोज चढाउन सुरु गर्दागर्दै उनको मृत्युु भएको थियो ।
सो घटनाको जानकारी मूल प्रवाहका केन्द्रीय सदस्य तथा मध्यदक्षिण क्षेत्रीय अध्यक्ष रामप्रसाद पौडेललाई मिल्नासाथ घनश्याम शर्मासमेतको प्रतिनिधिमण्डलले पसलको सञ्चालकसँग वार्ता गरेको थियो ।
वार्तापश्चात मृतकको दाहसंस्कार खर्चस्वरूप मृतककी पत्नीको नाममा सो रकम दिने ठेगान भएको थियो । उक्त रकम आइएमई गरी पठाइदिने समझदारी भएको छ ।
