गणेश अधिकारी, पोखरा ।
राष्ट्रिय जनमोर्चा कास्कीको पाचौँ जिल्ला सम्मेलन आगामी असोज २६ र २७ गते पोखरामा हुने भएको छ । शनिबार सम्पन्न राजमो जिल्ला समितिको विस्तारित बैठकले जिल्ला सम्मेलनको मिति तय गरेको हो ।
सम्मेलनका लागि ‘गणतन्त्र र राष्ट्रियताको रक्षा गरौँ, संघीयता खारेज गरौँ, राष्ट्रिय जनमोर्चा कास्कीको पाचौँ जिल्ला सम्मेलन सफल पारौँ’ भन्ने नारा तय गरिएको छ ।
विस्तारित बैठकले जिल्ला अध्यक्ष रविमोहन ढकालको संयोजकत्वमा २३ सदस्यीय जिल्ला सम्मेलन आयोजक समिति निर्माण गरेको छ ।
समितिको सदस्यहरुमा दमबहादुर रोका, लक्ष्मी कुँवर, जमुना खत्री, विष्णु पुरी, गणेश अधिकारी, रमेश गुरुङ, प्रविन पौडेल, सुशिला विक, देविलाल कँडेल, अर्जुन कार्की, सावित्रा केसी, हरिबहादुर खत्री, गंगाबहादुर थापा, नितेष पोखरेल, पुष्पराज अधिकारी, रीता घर्ती, मिरे विक, चन्द्रबहादुर केसी, अजित मियाँ, प्रेम गायक, जितबहादुर बोहरा, रामप्रसाद शर्मा र शान्ति गुरुङ रहनुभएको छ ।
यस्तै, पाँच सदस्यीय कार्यालयमा रविमोहन ढाकाल, गणेश अधिकारी, विष्णु पुरी, चन्द्रबहादुर केसी र सन्तोष पौडेल रहनुभएको छ ।
विस्तारित बैठकले सम्मेलन सफल पार्न विभिन्न समितिहरु गठन गरेको छ । जसमा रविमोहन ढकालको संयोजकत्वमा संगठन परिचालन समिति र आर्थिक समिति तथा गणेश अधिकारीको संयोजकत्वमा प्रचार प्रसार समिति गठन गरिएको छ ।
सम्मेलनअघि विभिन्न एरियास्तरका भेला एवम् प्रतिनिधि पर्यवेक्षक चयन लगायतका कार्यका लागि जिम्मेवारी बाँडफाँट गरिएको छ । जसमा रामबजार एरिया भेला भदौ १६ गते, बगर–पृथ्वीचोक एरिया भेला भदौ २ गते, लेकसाइड छोरेपाटन ८ गते र लेखनाथको २ गते भेला तय गरिएको छ ।
यस्तै, रुपा गाउँपालिका, मादी गाउँपालिका, अन्नपूर्ण र माछापुच्छ्रे गाउँपालिकाको भेला पछि तय गर्ने संयोजक ढकालले जानकारी दिनुभएको छ ।
कार्यक्रममा राजमो केन्द्रीय सदस्य एवम् गण्डकी प्रदेश अध्यक्ष शंकर बरालको आतिथ्यता रहेको थियो ।
