रामप्रसाद पौडेल, हैदरावाद (भारत) ।
राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलले अन्धजातिवादी सोचाइले जनजातिको मुक्ति नहुने बताउनुभएको छ ।
भारतको हैदरावादमा मूल प्रवाह अखिल भारत नेपाली एकता समाजका जनजाति विभाग र समता विभागको आयोजनामा सम्पन्न अन्तरक्रिया कार्यक्रम प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।
मूल प्रवाहको मध्यदक्षिण क्षेत्रीय समितिअन्तर्गतका ती दुई विभागको संयुक्त आयोजनामा सम्पन्न अगस्त ९, २०२३ बुधबारको कार्यक्रममा बोल्दै उहाँले भन्नुभयो– ‘अहिले नेपालमा विभिन्न जातिका नाममा देखिएको अन्धजातिवादी राजनीतिले वास्तवमा जातिजनजातिको मुक्ति हुनेभन्दा पनी जातीय अहङ्कार बढ्दै जाने र जातिजनजातिकै बिचमा विग्रह पैदा हुने छ ।’
सम्बोधनको क्रममा उहाँले नेपालका आदिवासी जनजाति र दलित समुदायको मुक्तिका लागि वर्गीय सङ्घयर्षको नै निर्णायक भूमिका रहेको जनाउनुभयो ।
‘फुटाऊ र राज गर भन्ने साम्राज्यवादी शक्तिको नियोजित रूपमा देखा परेको जातीय राजनितिको अभिव्यक्ति नै अन्धजातिवाद र अन्धराष्ट्रवाद हो’ उहाँले भन्नुभयो– ‘जसले न त कुनै जातजातिको उत्थान गर्न सक्छ, न राष्ट्रिय स्वाभिमानको रक्षा गर्न नै सक्ने सामथ्र्य राख्दछ ।’
विश्वका जातजाति र जनजातिको उत्थान र अधिकार संरक्षण गर्नको लागि संयुक्त रास्ट्र सङ्घले सन् १९९५ देखि २००४ सम्मलाई आदिवासी दसकको रूपमा घोषणा गरेको तथा र १९९४ देखि अगस्त ९ लाई विश्वभरिका आदिवासी जनजातिका सङ्घसंस्थाले विश्व आदिवासी दिवसको रूपमा मनाउन सुरु गरेका बताउनुभयो ।
‘फेरि पनि यस दिवसलाई साम्राज्यवादी शक्तिको लगानीमा बनेका गैरसरकारी संस्थाहरूले आर्थिक दोहन गर्ने नारा बनाउने गरिएको छ’ उहाँले भन्नुभयो ।
‘यद्यपि यसो भनिरहँदा केही पनि भएकै छैन भन्ने कुरा चाहिँ होइन’ उहाँले प्रष्टीकरण दिनुभयो– ‘तर केवल अधिकारको कुरा गर्ने, व्यवहारमा भने केवल कुन्ठा प्रकट गरेर जातीय मुक्ति सम्भव छैन ।
कार्यक्रममा मूल प्रवाहका महासचिव प्रेम पौडेल, केन्द्रीय सदस्य तथा मध्यदक्षिण क्षेत्रीय अध्यक्ष रामप्रसाद पौडेल, अर्की केन्द्रीय सदस्य फूलबिना पौडेलको पनि आतिथ्य रहेको थियो ।
कार्यक्रममा जनजाति विभागका क्षेत्रीय संयोजक तिलक रानाले आधारपत्र प्रस्तुत गर्नुभएको थियो ।
