काठमाडौं । केही समयदेखि सिरियामा युद्ध भइरहेको छ। लाखौँ मानिस विस्थापित भएका छन् ।
आफ्नो घरछेउछाउ दिनदिनै हवाई आक्रमण हुन थालेपछि सिरियाको इड्लिब प्रान्तका अब्दुल्ला मोहम्मदले आफ्नी छोरीलाई तनावमुक्त राख्न अनौठो उपाय निकाले । उनले छोरी साल्वालाई विस्फोटन भएको सुन्दा हाँस्नुपर्छ भनेर सिकाए।
बम पड्केको आवाज सुन्दा हाँस्ने ति तीनवर्षे बालिकालाई उद्धार गरी टर्कीको एउटा सुरक्षित स्थानमा लगिएको छ।
बालिकाका पिताले हवाई आक्रमण हुँदा निस्किने ठूलो आवाजबाट उनी भयभीत नहून् भनेर हाँस्न सिकाएका थिए। गत महिना भाइरल भएको एउटा भिडिओका कारण उनी चर्चामा आएकी थिइन्।
त्यो भिडियोमा युद्धक विमानले बम आक्रमण गर्दा विस्फोटन भएको सुनेर उनी घरभित्र हाँसिरहेको देखिन्छ।
त्यसको एक हप्तापछि टर्कीको सरकारले ती बालिका र उनका अभिभावकलाई सीमा पार गरेर टर्की जान सहयोग गरेको बुझिएको छ।
सिरियाली भूभागमा पर्ने इड्लिब प्रान्तमा विद्रोहीहरूको नियन्त्रण छ।
उक्त क्षेत्रमा टर्कीले सघाएको विद्रोही समूह र सिरियाली सेनाबीच भीषण युद्ध सुरु भएपछि गत डिसेम्बरयता झन्डै १० लाख मानिस भागेर सिरिया र टर्कीको सीमा क्षेत्र पुगेका छन्। बीबीसी
