काठमाडौँ । अखिल नेपाल जनजाति सम्मेलनका केन्द्रीय सदस्य रामबहादुर पुनको निधनप्रति नेकपा (मसाल) र राष्ट्रिय जनमोर्चाले भावपूर्ण श्रद्धाञ्जली व्यक्त गरेका छन् । साथै उनीहरूले शोकसन्तप्त परिवारप्रति समवेदना पनि व्यक्त गरेका छन् ।
२०८० साउन २२ गते सोमबार मसाल र राजमोले छुट्टाछुट्टै शोकवक्तव्य जारी गर्दै रामबहादुर पुन जुझारु, इमानदार, निष्ठाबद्ध र अनुशातिसत सदस्य रहेको उल्लेख गरिएको छ ।
मसालभित्र का. भूमिपाल नाम रहेको पुनको निधनबाट सशक्त, परिपक्व, होनहार, प्रतिबद्ध र अनुशासित सदस्यलाई गुमाउनुपरेको वक्तव्यका उल्लेख छ ।
नेकपा (मसाल) काम महामन्त्री मोहनविक्रम सिंहद्वारा जारी शोकवक्तव्य यस्तो छ :
“बागलुङ जिल्ला काठेखोला गाउँपालिका–८ लेखानी (हाल रूपन्देही जिल्ला तिलोत्तमा नगरपालिका–९ मङ्गलापुर) निवासी कामरेड रामबहादुर पुन (का. भूमिपाल) को चितवन मेडिकल अस्पतालमा मुटुरोगको उपचारको क्रममा २०८० साउन २१ गते ६६ वर्षको उमेरमा मृत्यु भएको छ । हामीले उहाँको मृत्युप्रति गहिरो दुस्ख व्यक्त गर्दै सन्तप्त परिवारजनप्रति समवेदना प्रकट गर्दछौँ ।
का. भूमिपाल मिलनसार र सामाजिक व्यक्तित्वका साथै हाम्रो पार्टीको जुझारु, इमानदार, निष्ठाबद्ध र अनुशासित सदस्य हुनुहुन्थ्यो ।
उहाँ लामो समयदेखि हाम्रो पार्टीको सदस्य रहनुभएको थियो । उहाँले मूल प्रवाह अखिल भारत नेपाली एकता समाजका विभिन्न तहमा रहेर प्रवासी नेपालीको हकहितका लागि सङ्घर्ष गर्नुभएको थियो । पछिल्लो समयमा उहाँ अखिल नेपाल जनजाति सम्मेलनको केन्द्रीय सदस्य हुनुहुन्थ्यो । पार्टीमा उहाँ बाग्लुङ जिल्लाको बाग्लुङ नगरपालिकाअन्तर्गत एउटा सेल कमिटीको सेक्रेटरी हुनुहुन्थ्यो ।
का. भूमिपालको मृत्युबाट पार्टीले एउटा सशक्त, परिपक्व, होनहार, प्रतिबद्ध र अनुशासित सदस्यलाई गुमाउनुपरेको छ । उहाँको मृत्युबाट हाम्रो पार्टीको आन्दोलनका साथै नेपालको जनजाति मुक्ति आन्दोलनमा गम्भीर क्षति भएको छ । अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
त्यस्तै, राजमो अध्यक्ष चित्रबहादुर केसीको हस्ताक्षरमा जारी गरिएको शोकवक्तव्य यस्तो छ :
“बागलुङ जिल्ला काठेखोला गाउँपालिका–८ लेखानी (हाल रुपन्देही जिल्ला तिलोत्तमा नगरपालिका–९ मङ्गलापुर) निवासी कामरेड रामबहादुर पुनको चितवन मेडिकल अस्पतालमा मुटुरोगको उपचारको क्रममा २०८० साउन २१ गते ६६ वर्षको उमेरमा मृत्यु भएको छ । हामीले उहाँको मृत्युप्रति गहिरो दुस्ख व्यक्त गर्दै शोक सन्तप्त परिवारजनप्रति समवेदना प्रकट गर्दछौँ ।
का. रामबहादुर पुन मिलनसार र सामाजिक व्यक्तित्वका साथै राष्ट्रिय जनमोर्चाको जुझारु, इमान्दार, निष्ठाबद्ध र अनुशासित सदस्य हुनुहुन्थ्यो । उहाँ लामो समयदेखि हाम्रो पार्टीमा आबद्ध भई राजनीतिमा सक्रिय रहनुभएको थियो । उहाँले मूल प्रवाह अखिल भारत नेपाली एकता समाजका विभिन्न तहमा रहेर प्रवासी नेपालीको हकहितका लागि सङ्घर्ष गर्नुभएको थियो । पछिल्लो समयमा उहाँ अखिल नेपाल जनजाति सम्मेलनको केन्द्रीय सदस्य हुनुहुन्थ्यो ।
का. रामबहादुर पुनको मृत्युबाट पार्टीले एउटा सशक्त, परिपक्व, होनहार, प्रतिबद्ध र अनुशासित सदस्यलाई गुमाउनुपरेको छ । उहाँको मृत्युबाट हाम्रो पार्टीको आन्दोलनका साथै नेपालको जनजाति मुक्ति आन्दोलनमा गम्भीर क्षति भएको छ । अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
