काठमाडौँ । अखिल नेपाल जनजाति सम्मेलनका केन्द्रीय सदस्य रामबहादुर पुनको निधन भएको छ ।
मुटुरोगको उपचार गराइरहनुभएका पुनको २०८० साउन २१ गते आइतबार राती ११ बजेतिर चितवन मेडिकल कलेजमा निधन भएको हो ।
प्रेसर, सुगरलगायतका स्वास्थ्य समस्या रहेका पुनको बुटवल, काठमाडौँ र चितवनमा उपचार भइरहेको थियो । पछिल्लो समय चितवनस्थित चितवन मेडिकल कलेजको आई.सी.यू. मा राखी उपचार भइरहेकै बेला उहाँको असामयिक निधन भएको हो ।
परिवारजनका अनुसार उहाँको आजै रुपन्देहीस्थित मगरघाटमा दाहसंस्कार गर्ने योजना रहेको छ ।
बागलुङको काठेखोला गाउँपालिका वडा नम्बर ८ लेखानीमा निवासी पुन पछिल्लो समयमा रुपन्देहीको तिलोत्तमा नगरपालिका वडा नम्बर ९ मङ्गलापुरमा बस्दै आउनुभएको थियो ।
मूल प्रवाह अखिल भारत नेपाली एकतामा पुराना कार्यकर्ता रहनुभएका पुन भारतमा अखिल नेपाल जनजाति सम्मेलनको सङ्गठन रहेका बेला त्यसको भारत शाखाको उपाध्यक्ष पनि हुनुहुन्थ्यो । पछि नेपाल आइसकेपछि उहाँ जनजाति सम्मेलनको केन्द्रीय समितिको सदस्य रहँदै आउनुभएको थियो ।
२०१४ भदौ १० गते जन्मनुभएका पुनको परिवारमा पत्नी, एक छोरी र दुई छोराहरू छन् ।
