टुकबहादुर रामदाम, मस्कट (ओमान) ।
ओमान नेपाली एकता समाजका अध्यक्ष छविलाल बस्नेतले अहिलेको गणतान्त्रिक व्यवस्था राजनीतिकै कारणले आएको बताउँदै राजनीतिप्रति छुवाछूत नगर्न आग्रह गर्नुभएको छ ।
अगस्त ४, २०२३ का दिन मस्कटको अजैवा होटलमा सम्पन्न नेपाली समाज ओमानको दसौँ अधिवेशनलाई शुभकामना दिँदै उहाँले यस्तो अभिव्यक्ति दिनुभएको हो ।
राजनीतिको ‘र’ पनि सुन्न नचाहनेहरूको आलोचना गर्दै उहाँले सही राजनीतिबारे सही समझदारी बनाउनुपर्ने आवश्यकतामा जोड दिनुभयो ।
मन्तव्यको क्रममा उहाँले नेपाली समाज ओमन पुरानो सङ्गठन भएको विषयगत रूपमा सहकार्य गर्न सकिने पनि बताउनुभयो ।
‘एकता समाजले कुन बुँदामा कहाँ सहयोग गर्नुपर्छ ? पूर्ण रूपमा साथसहयोग सहकार्य गर्ने छौँ’ उहाँले भन्नुभयो– ‘तर राजनीति भन्नेबित्तिकै अलि पर जाने र अप्ठेरो मान्ने तथा राजनीतिको ‘र’ पनि उच्चारण गर्न हिच्किचाउनुभन्दा पनि आजको यो व्यवस्था राजनीतिकै फल भएको बुझ्न र बुझाउन जरुरी छ ।’
सोही क्रममा ओमान नेपाली एकता समाजका अध्यक्ष छबिलाल बस्नेतले नेपाली समाज ओमान भन्नेबित्तिकै विशुद्ध नेपालीको संस्था भएको र यस संस्था सबैभन्दा पुरानो पाको भएको हुनाले आउँदो अधिवेशनसम्म सबैको साझा तथा अभिभावक बन्नुपर्ने अपेक्षा राख्नुभयो ।
‘प्रवासी नेपाली श्रमिकको हकहित चाहदै श्रमिकका समस्या समाधानलगायत सकारात्मक विभिन्न संयुक्त कार्यक्रम गर्न विगतमा जस्तै आगामी दिनमा पनि ओमान नेपाली एकता समाज सदैव साथसहयोग र सद्भावसहित सहकार्य गर्न हामी तयार छौँ’ उहाँले भन्नुभयो ।
अध्यक्षमा रविन्द्र राजथला
अधिवेशनबाट अध्यक्षमा रविन्द्र राजथला चयन हुनुभएको छ भने वरिष्ठ उपाध्यक्षमा गोविन्द कुँवर, उपाध्यक्षमा धनकुमारि थारू, महासचिवमा दुर्गा कार्की तथा सचिवमा अनिल केसी चयन हुनुभएको छ ।
निवर्तमान अध्यक्ष विकाश घलेको अध्यक्षतामा अघि बढेको सो अधिवेशनमा प्रमुख अतिथि नेपाली दूतावास ओमानका राजदूत डोरनाथ अर्याल, विशेष अतिथि दूतावासकै द्वितीय सचिव विशेष साह साथै ओमानमा कृयाशील विभिन्न सङ्घसंस्थाका प्रतिनिधिहरू अतिथिती हुनुहुन्थ्यो ।
कार्यक्रमको अवसरमा केही दिन अगाडि मात्रै नियुक्ति भई आउनुभएको दूतावास ओमानका द्वितीय सचिव विशेष साहलाई सबैमाझ परिचय गराउँदै कार्यक्रममा उपस्थित नेपाली तथा सङ्घसंस्थाका प्रतिनिधिले उहाँलाई संयुक्त रूपमा शुभकामना पनि दिनुभएको थियो ।
